Governu Timor-Leste

Iha loron 10 fulan-juñu tinan 2021, iha serimónia ida, ne’ebé hala’o iha Sentru Konvensaun Dili (CCD), Timor-Leste hahú distribuisaun vasina doze daruak hasoru SARS-CoV-2, ba sidadaun sira ne’ebé simu ona doze dahuluk iha fulan-abríl liubá, hafoin horseik vasina 100.800 to’o ona mai liuhusi mekanizmu COVAX.

Vise-Primeira-Ministra Armanda Berta dos Santos no vise-Primeiru-Ministru José Maria dos Reis, Ministru Prezidénsia Konsellu Ministrus, Fidelis Manuel Leite Magalhães, Prezidente Parlamentu Nasionál, Aniceto Longuinhos Guterres Lopes, Vise-Prezidente Parlamentu Nasionál, Maria Angelina Lopes Sarmento, no Prezidente Tribunál Rekursu, Deolindo dos Santos, hanesan sidadaun dahuluk iha país ne’e maka simu vasina AstraZeneca doze daruak nian no kompleta vasinasaun hasoru COVID-19.

Ministra Saúde no Vise-Prezidente Komisaun Interministeriál ba Elaborasaun no Koordenasaun kona-ba Ezekusaun Planu Vasinasaun hasoru COVID-19, Odete Maria Freitas Belo, iha ninia intervensaun salienta kona-ba seguransa no efikásia kompovada husi vasina rua ne’ebé eziste iha país, AstraZeneca no Sinovac, aleinde kondisaun nesesária ba ninia armazenamentu no refrijerasaun ne’ebé bele adapta fasil liu ba kontestu nasionál, tanba kondisaun hirak ne’ebé presiza eziste ona iha país ne’e no hanesan ho hirak ne’ebé uza iha programa vasinasaun nasionál nian sira seluk. 

Odete Maria Freitas Belo reitera objetivu previstu iha Planu Nasionál Vasinasaun nian, atu, to’o tinan ne’e nia rohan, bele imuniza populasaun tomak ho tinan 18 ba leten no hateten katak durante fulan-juñu ka fulan-jullu tenke alkansa ona meta 20% husi populasaun ho pelumenus vasina doze ida.

Vise-Primeira-Ministra no Prezidente Komisaun Interministeriál ba Elaborasaun no Koordenasaun kona-ba Ezekusaun Planu Vasinasaun hasoru COVID-19 nian, iha ninia diskursu, deskreve konstranjimentu no difikuldade sira ne’ebé virus SARS-CoV-2 kria ona ba populasaun, la’os de’it iha nivel saúde nian maibé mós iha planu ekonómiku no sosiál, tanba ne’e nia destaka importánsia husi kampaña vasinasaun nian no liu-liu kona-ba inísiu distribuisaun doze daruak nian, tanba solusaun únika atu filafali ba normalidade maka vasinasaun.

Lori Governu nia naran, nia husu entidade, lider polítiku, veteranus, autoridade komunitária, konfisaun relijioza hotu-hotu nia kolaborasaun, atu nune’e hotu-hotu hamutuk hodi apoia Programa Nasionál Vasinasaun nian.

Governante ne’e agradese ba Austrália, Xina no Mekanizmu COVAX nian ba doasaun vasina ba Timor-Leste, no ba Organizasaun Mundiál Saúde nian, UNICEF no organizasaun hotu-hotu ne’ebé apoia ona, to’o oras ne’e, implementasaun kampaña nasionál vasinasaun hasoru COVID-19.

Hahú ohin, ema na’in 28.412 dahuluk ne’ebé simu ona vasina iha faze dahuluk, husi loron 7 to’o loron 28 fulan-abríl, bele hahú simu AstraZeneca doze daruak, bainhira kompleta ona períodu intervalu nian semana ualu entre kada doze.

To’o loron 8 fulan-juñu, ema na’in 28.412 iha país laran simu ona doze dahuluk husi vasina hasoru COVID-19, ne’ebé reprezenta 12% husi populasaun ho idade 18 ba leten. Iha Dili, munisípiu ne’ebé afetadu liu husi surtu COVID-19, fó ona doze dahuluk ba ema hamutuk 80.948, 40% husi populasaun ho idade 18 ba leten iha munisípiu ne’e. 

Durante serimónia ne’e lansa mós aplikasaun telemovel RSETL husi Programa Saúde iha Família, plataforma ida ne’ebé sei kontein rejistu kona-ba vasinasaun hasoru COVID-19 no sei sai hanesan komprovativu ida hodi halo viajen entre munisípiu sira ne’ebé abranje husi impozisaun serka sanitaria.