Governu Timor-Leste

Primeiru-Ministru Kay Rala Xanana Gusmão, akompaña husi Ministru Edukasaun, João Cancio, Vise-Ministru Ekonomia no Dezenvolvimentu, Cristiano da Costa, no Sekretáriu Estadu ba Defesa, Júlio Tomás Pinto, halo konsulta nasionál ba Planu Estratéjiku Dezenvolvimentu (PEDN) Nasional ba loron hitu ho povu sub-distritu Baucau, distritu Baucau.

Iha intervensaun ba Konsulta Nasionál ne’e, Primeiru-Ministru hateten katak “Livru Planu Estatéjiku Dezenvolvimentu ne’e hanesan bíblia ba konstrusaun Estadu, depois konsulta nasionál iha teritóriu Timor-Leste tomak, Governu sei halo konsulta ho Parlamentu Nasionál hodi halo aprovasaun atu nune’e Governu se’e deit bele hatutan”.

Estratéjias ne’e, bazeia ba nesesidade estratéjika ida ba futuru atu Timor-Leste hetan armonia ho rejiaun no bele utiliza nia rekursu ho maksimiza ka hasa’e a’as benefísius ba tempu naruk iha áreas infra-estruturas, edukasaun, saúde, empregu no evolusaun sektóres públiku no privadu.

Hatán ba ejijênsia nebé mak povu sub-distritu Baucau levanta, relasiona ho problemas be’e mós, estrada, eskola, uma móras, enerjia elétrika, ponte no informasaun korupsaun iha ministériu sira hotu, Primeiru-Ministru esplika katak “Iha Planu Estratéjiku Dezenvolvimentu Nasionál hateten mós katak, hahu husi tinan 2010 to'o iha 2030, husi Tutala to'o iha fatumea, Atauro to'o Same no Oe-Kuse labele iha tan família ida atu hela iha uma at, nune'e mós iha PEDN nia laran rasik defini mos atu halo konstrusaun bázika hanesan be’e mós, eletrisidade, estrada, ponte tenke diak hotu ona, kuandu sasán sira ne’e la iha polítika sira ukun la folin”.

Iha Povu sub-distritu Baucau niaoin Primeiru-Ministru Kay Rala Xanana Gusmão, hato'o mos katak, Timor-leste nu’udar Estadu demokrátiku bele iha diferensa hanoin no tempu to'o ona atu hapara violensia, no tama ba iha konstrusaun ba povu.