Sorumutuk Estraordináriu Konsellu Ministrus nian iha loron 8 fulan-marsu tinan 2021
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordináriu Konsellu Ministrus nian iha loron 8 fulan-marsu tinan 2021
Konsellu Ministrus hala’o sorumutuk iha Ministériu Finansas, iha Dili, no hafoin análize ba aprezentasaun husi Sala Situasaun, husi Sentru Integradu Jestaun Krize, kona-ba pontu situasaun SARS-CoV-2 nian iha país ne’e, Governu deside ona atu impoin serka sanitária no konfinamentu obrigatóriu iha Munisípiu Dili, durante loron hitu, hahú tuku 00:00 loron 9 fulan-marsu to’o tuku 23:59 loron 15 fulan-marsu, ho posibilidade atu aumenta ba loron hitu tan.
Nune’e, bandu hala’o dezlokasaun liuhusi rai, tasi ka via aérea ba Munisípiu seluk, exetu iha kazu hirak ne’ebé iha fundamentu forte ho razaun seguransa, saúde públika, umanitária ka seluk ne’ebé hatudu katak importante duni ba realizasaun interese públiku nian, ne’ebé hetan autorizasaun husi Ministériu Interiór.
Impoin ba populasaun ne’ebé hela iha munisípiu Dili atu hela iha uma de’it, maibé la taka dalan atu sira sai husi uma tanba nesesidade ne’ebé labele husik liu, hanesan atu hetan asisténsia médika ba an rasik ka família ne’ebé sai hanesan ninia responsabilidade ka nia maka tau-matan; atu partisipa iha dilijénsia judisiál ka polisiál sira, ba ida-ne’ebé sira notifikadu; atu sosa sasán ka selu servisu sira primeira nesesidade nian, liuliu sosa ai-han, selu fornesimentu enerjia elétrika ka selu servisu telekomunikasaun no asesu ba internet; no atu kumpre obrigasaun profisionál sira, ba ida-ne’ebé la dispensadu husi entidade empregadora atu hala’o.
Membru Governu no órgaun ezekutivu másimu husi ema koletiva públika sira husi administrasaun indireta identifika funsionáriu, ajente no traballadór sira husi administrasaun públika ne’ebé tenke garante servisu esensiál sira no ne’ebé la dispensadu husi kumprimentu ba devér atu ba serbisu iha serbisu-fatin.
Ministru Koordenadór Asuntus Ekonómikus no Ministru Turizmu, Komérsiu no Indústria sei aprova, liuhusi despaxu konjuntu, modelu ba identifikasaun traballadór sira husi setór privadu ne’ebé entidade empregadora labele dispensa husi devér atu halo serbisu iha serbisu-fatin.
Bandu hala’o eventu saida de’it ho natureza sosiál, kulturál, desportiva no relijioza ne’ebé halibur ema barak.
Kumprimentu ba devér hirak ne’ebé hatuur ona iha kotuk ne’e sei fiskaliza husi forsa polísia nian sira.
Ikusliu, Konsellu Ministrus aprova ona Planu kona-ba Vasinasaun Kontra COVID-19, ne’ebé aprezenta husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, no husi Komisaun Interministeriál ba Elaborasaun no Koordenasaun kona-ba Ezekusaun Planu kona-ba Vasinasaun kontra COVID-19. Tuir roteiru ne’ebé aprezenta ona, hein katak doze 33.600 dahuluk to’o iha Timor-Leste iha semana dahaat fulan-marsu tinan 2021 nian no lansamentu ba faze dahuluk vasinasaun sei hahú iha semana daruak fulan-abríl nian. Tuir previzaun, ema hotu-hotu ho idade 18 ba leten sei hetan vasina to’o tinan 2021 nia rohan. Vasinasaun ba sira-ne’ebé ho idade tinan 18 ba kraik sei hala’o iha tinan 2022, maibé ninia planifikasaun sei depende ba rekomendasaun téknika husi Organizasaun Mundiál Saúde nian. Atividade planeamentu no preparasaun implementasaun planu vasinasaun nian la’o hela, hanesan preparasaun kondisaun armazenamentu nian no formasaun ba ekipa sira. REMATA
