Governu asina akordu subvensaun anuál ho Konferénsia Episkopál Timorense

Ses. 19 fevereiru 2021, 17:15h
IMG_4132

Primeiru-Ministru, Taur Matan Ruak, no Arsebispu Metropolitanu Provínsia Dili nian, Dom Virgílio do Carmo da Silva, nu’udar reprezentante Prezidente Konferénsia Episkopál Timorense (KET), Dom Norberto do Amaral, Bispu Dioseze Maliana, ohin, loron 19 fulan-fevereiru, asina ona akordu ida-ne’ebé define atribuisaun, husi parte Governu nian, subvensaun públika ida ne’ebé korresponde ba valór totál dolar amerikanu millaun sanulu resin-lima ba tinan finanseiru 2021 nian hodi realiza atividade sira iha área edukativa, sosiál no governu ekleziál. Serimónia asinatura ne’e hala’o iha Auditóriu Prezidénsia Konsellu Ministrus, iha Palásiu Governu, iha Dili.

Akordu ida-ne’e selebra bazeia ba konkordata ne’ebé asina ona iha loron 14 fulan-agostu tinan 2015, entre Repúblika Demokrátika Timor-Leste no Santa Sé, ne’ebé hatuur kuadru jurídiku kona-ba relasaun bilaterál sira entre Estadu rua ne’e no Akordu-Kuadru ne’ebé asina ona iha loron 16 fulan-juñu tinan 2017 entre Governu no KET. Akordu hirak-ne’e prevee kontribuisaun anuál ida, tuir disponibilidade finanseira Governu nian, ba atividade sira ho karakter sosiál, edukativu, no governu ekleziál Igreja Katólika nian. Valór no modalidade sira husi subvensaun ne’ebé atu fó sei regula tinan-tinan ho akordu espesífiku sira entre Governu no Konferénsia Episkopál Timorense nian.

Akordu ne’ebé ohin asina ona ne’e prevee katak 50% husi valór subvensaun nian sei utiliza ba fim sira ho karakter edukativu no pelumenus 25% ba fim sira ho karakter sosiál. Prevee mós katak la liu husi 15% maka sei uza ba fim governu ekleziál nian no másimu 10% maka sei uza ba jestaun kona-ba subvensaun ne’ebé fó ona ne’e.

Partisipa mós iha serimónia ne’e maka Ministru Prezidénsia Konsellu Ministrus, Fidelis Manuel Leite Magalhães, Ministru Asuntu Parlamentár no Komunikasaun Sosiál, Fransisco Martins da Costa Pereira Jerónimo, Ministru Finansas, Rui Augusto Gomes, Ministra Negósiu Estranjeiru no Kooperasaun, Adaljiza Albertina Xavier Reis Magno no Bispu Dioseze Baukau, Dom Basílio do Nascimento.

Prezidente Konferénsia Episkopál Timorense (KET), Dom Norberto do Amaral, Bispu Dioseze Maliana, la marka prezensa iha serimónia ne’e tanba serka sanitária ne’ebé aplika ba Munisípiu Bobonaru, ne’ebé bandu dezlokasaun entre munisípiu ne’e no sira seluk. Serimónia ne’e la konta mós ho prezensa husi Núnsiu Apostóliku ba Timor-Leste, Joseph Salvador Marino, ne’ebé hala’o hela períodu kuarentena obrigatória hafoin nia to’o iha nasaun ne’e foin daudaun ne’e.

   Ba leten