Timor-Leste sei realiza ba Dahuluk, iha tinan-2021, Enkontru Trimestrál ho Parseirus Dezenvolvimentu iha 19 fevereiru

Ter. 16 fevereiru 2021, 17:34h
151063764_2951416161771782_3419630228795406334_o

Ministériu Finansas (MF) no Ministériu Negósius Estranjeirus no Kooperasaun (MNEK), sei organiza ba Dahuluk iha tinan-2021, Enkontru Trimestrál ho Parseirus Dezenvolvimentu (QDPM, sigla Inglés) iha Sexta-feira, 19 fevereiru 2021, husi 08:30 to’o 13:00 iha Salaun Auditóriu Kay Rala Xanana Gusmão, Ministériu Finansas.

Enkontru loron sorin-balun ne’e sei prezide husi Ministru Finansas, Rui Augusto Gomes no Ministra Negósiu Estranjerus no Kooperasaun, Adaljiza Magno. Enkontru ida-ne’e sei serve hanesan forum ida ba Governu no Parseirus Dezenvolvimentu atu kontinua mantein komunikasaun ida ne’ebé nakloke no atu asegura katak parte-rua atualizadu ho kestaun-sira ne’ebé mak bele afeita ba nasaun ninia dezenvolvimentu.

Durante eventu, ne’e, sei iha aprezentasaun husi Ministériu Finansas kona-ba Orsamentu Jerál Estadu 2021 no Governu ninia polítika kona-ba rekuperasaun ekonómiku ba tempu médiu no tempu naruk. Sesaun ida-ne’e hanesan oportunidade ida ba Parseirus Dezenvolvimentu atu aprende liután kona-ba Governu ninia abordajen no oinsá parseirus dezenvolvimentu sira bele fornese apoiu nesesáriu sira.

Ministériu Saúde sei halo aprezentasaun kona-ba Resposta-sira ba Covid-19 no Planu Nasionál Introdusaun Vasina. Iha sesaun ida-ne’e, partisipante-sira hetan informasaun kona-ba Governu nia planu no oinsá atu implementa, área-sira ne’ebé mak presiza hetan apoiu adisionál husi parseirus dezenvolvimentu, no oinsá atu forma estrutura apoiu potensiál. Hafoin sesaun ida-ne’e, Embaixada Austrália iha Timor-Leste mós sei aprezenta kompilasaun ida kona-ba apoiu husi Parseirus Dezenvolvimentu relevante sira hotu ba planu introdusaun vasina, atu nune’e bele fó imajen ida kompletu kona-ba esforsu-sira ba introdusaun vasina ne’ebé efikáz.

Enkontru ne’e sei konklui ho Tour de Table Parseirus Dezenvolvimentu iha ne’ebé kada partisipante-sira sei atualiza sira nia atividades atuál no planu atividades altu-nivel ne’ebé mak relevante ba Governu no partisipante sira seluk atu hatene.

Enkontru ida-ne’e sei hetan partisipasaun husi reprezentante-sira husi liña ministériu relevante, Korpu Diplomátiku, Parseirus Dezenvolvimentu, Setór Privadu, Organizasaun Sosiedade Sivíl no Mídia.

   Ba leten