Lista Finál kona-ba kandidatu sira ne’ebé selesionadu ba Ensinu Superiór Públiku ba tinan akadémiku 2021
Ministériu Ensinu Superiór, Siénsia no Kultura, ohin, loron 5 fulan-fevereiru tinan 2021 publika ona lista finál kona-ba kandidatu sira ne’ebé selesionadu ba Ensinu Superiór Públiku ba tinan akadémiku 2021.
Totál kandidatu na’in 5582 maka pasa ona iha selesaun hodi tama ba ensinu superiór públiku nasionál, no husi númeru ida-ne’e, na’in 5282 tama ba Universidade Nasionál Timor Lorosa’e (UNTL) no 300 maka tama ba Institutu Politékniku Betanu nian (IPB).
Ho objetivu atu promove prinsípiu igualdade nian, mak estabelese ona rejime asesu nian rua, rejime jerál, ne’ebé korresponde ba finalista sira ensinu sekundáriu jerál no tékniku-vokasionál nian iha tinan 2020 no rejime espesiál ne’ebé fó oportunidade ba kandidatu sira iha situasaun exesionál.
Iha rejime jerál, alunu na’in 4075 maka pasa iha selesaun, no husi númeru ida-ne’e, na’in 3865 tama ba UNTL no na’in 210 tama ba IPB.
Liuhusi kategoria tolu – oportunidade, veteranu sira-nia oan no família kbiit-laek nia oan, husi rejime espesiál, kandidatu hamutuk na’in 1507 maka selesionadu.
Iha kategoria oportunidade nian, ne’ebé inklui alunu sira-ne’ebé remata ona sekundáriu iha tinan sira liubá, iha tinan haat ikus, kandidatu hamutuk na’in 457 maka admitidu, na’in 442 ba UNTL no na’in 35 ba IPB.
Iha kategoria veteranu no martir luta ba libertasaun nasionál nia oan nian, na’in 661 maka tama ba UNTL no na’in 20 ba IPB, nune’e kandidatu hamutuk na’in 681 maka selesionadu.
Tama mós família kbiit-laek ninia oan sira hamutuk alunu na’in-248, na’in 228 ba UNTL no na’in 20 ba IPB.
