Governu deside reativar Sentru Integradu ba Jestaun Krize nian hanesan Sala Situasaun
Prezidénsia Konsellu Ministrus
VIII Governu Konstitusionál
...........................................................................................................................
Dili, Loron 2 fulan-fevereiru tinan 2021
Komunikadu Imprensa
Governu deside reativar Sentru Integradu ba Jestaun Krize nian hanesan Sala Situasaun
Ministru Prezidénsia Konsellu Ministrus no Portavós Governu nian, Fidelis Manuel Leite Magalhães, fó-sai ohin, loron 2 fulan-fevereiru tinan 2021, katak Ezekutivu, liuhusi despaxu Primeiru-Ministru nian, determina ona hodi ativa fila-fali Sentru Integradu Jestaun Krize (CIGC – sigla iha lian portugés), nu’udar Sala Situasaun, hodi responde ba pandemia virus SARS-CoV-2.
Desizaun ida-ne’e sei prodús efeitule hahú husi loron 2 fulan-fevereiru tinan 2021 husi tuku 00:00 no kaduka bainhira estadu emerjénsia remata.
Despaxu Primeiru-Ministru nian ne’e hatete katak “liga ba dekretamentu estadu emerjénsia no ba nesesidade atu garante koordenasaun efetiva no efikás ba organizmu Estadu nian hotu-hotu atu hatán ba ameasa ne’ebé maihusi COVID-19, asegura funsionamentu CIGC nian hanesan Sala Situasaun sai nu’udar asaun ida ne’ebé importante liu.
Prezidente Repúblika dekreta ona, iha loron 27 fulan-janeiru liubá, renovasaun ba estadu emerjénsia nian ba loron 30 tan, husi tuku 00:00 loron 2 fulan-fevereiru to’o tuku 23:59 loron 3 fulan-marsu tinan 2021, tanba haree katak “ iha mundu tomak, situasaun epidemiolójika hatudu tendénsia momoos ba agravamentu” no “liuliu evolusaun pandémika iha provínsia indonézia Sunda Orientál (Nusa Tenggara Timur, ka NTT)”, “impoin atu mantein medida importante lubun ida ne’ebé bele prevene importasaun SARS-CoV-2 ba territóriu nasionál no ninia tranzmisaun komunitária”.
Sala Situasaun ne’e sei funsiona iha Sentru Konvensaun Dili no sei iha mós unidade territoriál tolu, iha Rejiaun Administrativa Espesiál Oekusi Ambenu (RAEOA), iha Bobonaru no iha Kovalima. Unidade territoriál sira-ne’e sei sai responsavel atu ezekuta atividade sira Sala Situasaun nian iha nivel sirkunskrisaun administrativa nian sira eskalaun dahuluk nian.
Komandante Operasionál Sala Situasaun ne’e nian maka Primeiru-Ministru, ne’ebé sei sai nu’udar responsavel atu dirije operasaun hotu-hotu ne’ebé atu dezenvolve, atu koordena unidade sira no atu halo ligasaun entre Sala Situasaun no Konsellu Ministrus no ba órgaun singulár sira Governu nian. REMATA
