Governu Timor-Leste

Parlamentu Nasionál diskute no aprova ona Proposta Rezolusaun ba ratifikasaun Akordu kona-ba Servisu Aéreu ho Austrália, iha loron 26 fulan-janeiru tinan 2021, ho votu a favór 45, votu kontra 2 no abstensaun 12, iha debate ida ne’ebé marka mós prezensa husi Ministra Negósius Estranjeirus no Kooperasaun, Adaljiza Albertina Xavier Reis Magno, no Ministru Transportes no Komunikasoins, José Agustinho da Silva.

Hafoin leitura ba konkluzaun sira husi Komisaun Negósius Estranjeirus, Defeza no Seguransa (Komisaun B) Parlamentu Nasionál nian, Ministra Negósius Estranjeirus no Kooperasaun defende importánsia husi ratifikasaun akordu ne’e “ne’ebé sei lori benefísiu ba ekonomia nasionál”, hodi bele apoia “kreximentu turizmu nian no hasa’e empregabilidade nasionál”.

Akordu kona-ba Servisu Aéreu ne’e, nasaun rua asina ona iha tinan 2017 no Austrália ratifika tiha ona. Akordu ne’e bazeia ba país rua ne’e sira-nia hakarak atu promove sistema aviasaun internasionál nian ida ne’ebé kria konkorrénsia entre empreza sira husi transporte aéreu iha merkadu, ho servisu kompetitivu, inovadór no seguru sira.

Akordu ne’e buka mós atu asegura nivel seguransa no protesaun internasionál ne’ebé aas liután, hodi afirma fila-fali ninia preokupasaun séria ho atu no ameasa sira hasoru seguransa aviaun nian.

Ho ratifikasaun Akordu ne’e nian, kompañia aérea sira ne’e sei bele tama iha espasu aéreu país rua ne’e nian sein presiza autorizasaun antes, naran katak tenke halo tuir rekizitu regulamentár sira, inklui seguransa, ne’ebé sei permite aumentu konkorrénsia nian, ne’ebé bele hamenus kustu billete no kustu transporte merkadoria sira nian.