Governu Timor-Leste

Iha loron 28 fulan-novembru, Timor-Leste selebra tinan da-45 Proklamasaun Independénsia nian. Tinan ne’e, komemorasaun sira hala’o iha Munisípiu Likisá, ho tema “Hamutuk atu garante saúde públika no rekuperasaun ekonomia nasionál”. Iha tinan 1975, testu Proklamasaun Independénsia Repúblika Demokrátika Timor-Leste nian, Prezidente dahuluk, Francisco Xavier do Amaral, maka lee.

Eventu komemorasaun nian sira inklui Feira Nasionál ida iha suku Lauhata, iha Likisá, husi loron 22 to’o loron 27 fulan-novembru, ne’ebé organiza husi Ministériu Administrasaun Estatál no husi Ministériu Turizmu, Komérsiu no Indústria, atu promove produtu lokál sira no haforsa ekonomia nasionál.

Iha loron 27 no loron 28 fulan-novembru, Komisaun Organizadora ba selebrasaun Proklamasaun Independénsia nian, ne’ebé lidera husi Ministru Administrasaun Estatál, Miguel Pereira de Carvalho, prepara programa ida ne’ebé fahe ba parte tolu, ne’ebé inklui Misa Agradesimentu ida loron 27 dadeer, iha Igreja Parokiál São João de Brito, iha Likisá no serimónia ofisiál rua iha loron Proklamasaun Independénsia nian, iha Kampu Pilila, iha Munisípiu Likisá.

Iha loron 28 fulan-novembru, ho inísiu iha tuku 8 dadeer, serimónia hahú ho Hasa’e Bandeira Nasionál. Tuir fali ida-ne’e maka desfile militár, hakmatek minutu ida no kondekorasaun ba kombatente no veteranu Libertasaun Pátria nian sira, husi Prezidente Repúblika, Francisco Guterres Lú Olo. Hafoin diskursu Prezidente Repúblika nian, iha mós desfile ida no atividade desportiva sira.

Aleinde Prezidente Repúblika, Na’i-ulun sira seluk ne’ebé partisipa mós iha serimónia ne’e maka Prezidente Parlamentu Nasionál, Aniceto Longuinhos Guterres, Primeiru-Ministru, Taur Matan Ruak, Prezidente Tribunál Rekursu, Deolindo dos Santos no membru sira husi Governu Konstitusionál VIII. Selebrasaun ofisiál taka ho Hatún Bandeira Nasionál.