Komemorasaun Aniversáriu da-45 Proklamasaun Independénsia Repúblika Demokrátika Timor-Leste
Serimónia ofisiál komemorasaun aniversáriu da-45 Proklamasaun Independénsia Repúblika Demokrátika Timor-Leste nian, ne’ebé organiza husi Ministériu Administrasaun Estatál, sei hala’o iha Liquiça, iha loron 27 no 28 fulan-novembru.
Iha loron 27, tuku 8, hahú ho Misa Agradesimentu, iha Igreja Parokiál São João de Brito.
Iha loron 28 fulan-novembru, Loron Proklamasaun Independénsia nian, serimónia hahú iha tuku 8, ho Hasa’e Bandeira Nasionál, iha Kampu Pilila, ho prezensa Prezidente Repúblika, Francisco Guterres Lú Olo, Prezidente Parlamentu Nasionál, Aniceto Longuinhos Guterres, Primeiru-Ministru, Taur Matan Ruak, no Prezidente Tribunál Rekursu, Deolindo dos Santos. Tuir fali minutu ida hakmatek [minutu silénsiu], no tuku 9 liu minutu 55, kondekorasaun ba kombantente no veteranu sira Libertasaun Pátria nian, husi Prezidente Repúblika. Hafoin diskursu Prezidente Repúblika, iha tuku 10 liu minutu 40, iha desfile ida no hala’o atividade desportiva sira. Serimónia remata iha tuku 17, hafoin Hatún Bandeira Nasionál.
