Governu Timor-Leste

Atu hametin liutan relasaun bilateral entre Xina ho Timor-Leste maka rai rua ne’e hatudu duni komitmentu atu tulun malu liu husi sektor oin-oin deit, Timor-Leste simu kareta cameneti 10 (sanulu), hodi bele ajuda tula produtus agricultores nian, nomos mákina tratór hamutuk 30 (tolunulu). Haré ba situasun ida ne’e maka Repúblika Popular Xina nian realiza duni ajuda liu hosi okaziaun nebé maka iha fulan Outubro tinan 2009 Primeiru-Ministro Timor-Leste Xanana Gusmão vizita Provinsia Sinchuan. Iha tempu nebá duni maka Governu Lokal Provinsia Sichuan promete atu fotulun kareta ba agricultor Timoroan.

Ministru Agrikultura no Peskas Mariano Assanami Sabino simu ajuda hirak ne’e hosi embaixadór Xina ba Timor-Leste, Sr. Fu Yuancong, iha sede Ministériu Agrikultura no Peskas nian, Comoro, Díli.

Ajuda husi Guvernu Xina ne’e hodi hametinrelasaun bilateral entre povu agrikultor hosi Nasaun Timor-Leste no Xina, tamba ne’e prosesu dezenvolvimentu ba oin tenki identifika difikuldade povu agrikultor hasoru.

Wainhira seremónia entrega ekipamentu hirak ne’e hotu ba jornalista sira, Ministru Agrikultura no Peskas Assanami Sabino iha nia intervista hateten katak, “Ajudas ekipamentus hanesan kareta ho tratór ida ne’e hodi responde ba nesesidade ita nian, liu-liu ba agrikultores sira atu bele uza hodi tula fini, adubus , no mós produtus seluk tan tamba susar tebes ba agrikultores no Ministériu Agrikultura rasik nebé maka trasporte la sufisiente”.

Assanami Sabino realsa liutan katak “traktores ne’e sei oferese ba fatin sira nebé mak fila rai gratuita ho bele apoia tan traktór nebé mak governu sosa ona ho nuné kareta sira ne’e sei entrega ba Diresaun Servisu Agrikultura no Hortikultura, tamba durante ne’e distribuisaun fini, adubu no material ba agrikultores no mós apoiu ba Sentru Agrikultura nebé mak Ministériu estabelese ona iha distritus sei hetan difikuldades tamba falta transporte.”

“Ba oin sei fo apoiu maka’as iha parte fini ho adubus maibe laós atu utiliza adubu kímiku, tamba adubu orgániku, tamba orienta ba adubu biolójiku hodi utiliza instrumentu rai ne’e diak liu tan atu nune’e halo sai fatin diak liutan atu haburas produtus. Alende ne lori funsionario agrikultores tomak no povu agrikultor nia naran Ministru Assanami Sabino hato’o agredesimentu ba povu agrikultor Nasaun Xina nian”.