Ministru Prezidénsia Konsellu Ministrus hala’o sorumutuk ho Embaixadór Brazil nian

Kin. 19 novembru 2020, 16:43h
IMG_00612

Ministru Prezidénsia Konsellu Ministrus, Fidelis Manuel Leite Magalhães, iha loron 18 fulan-novembru tinan-2020, hala’o sorumutuk ho Embaixadór Brazil iha Timor-Leste, Aldemo Garcia.

Durante enkontru, Diplomata ne’e, ne’ebé iha fulan ida-ne’e hakotu ona nia misaun iha Timor-Leste, louva trajetória konsolidasaun demokrasia nian iha Timor-Leste no koa’lia liu kona-ba rezultadu husi relatóriu Freedom House ne’ebé hatudu Timor-Leste hanesan país demokrátiku liu iha Sudeste Aziátiku, haree ba eleisaun justa no transparente ne’ebé hala’o ona no transferénsia pasífika ba podér entre partidu diferente sira.

Embaixadór ne’e reafirma mós Brazíl nia disponibilidade hodi apoia Timor-Leste iha área kooperasaun téknika oin-oin, hanesan iha nivel dezenvolvimentu setór agríkola, ho kooperasaun ho Ajénsia Brazileira ba Kooperasaun (ABC, sigla iha lian portugés) no ho Empreza Brazileira ba Peskiza Agropekuária (Embrapa), ho tékniku sira ne’ebé mai iha Timor-Leste no kriasaun ba sentru peskiza agríkola nian ida. Aldemo Garcia destaka mudansa boot iha setór agríkola iha Brazíl, ne’ebé permite katak durante tinan 40 ikus, nasaun sai ona husi kondisaun importadór ai-han nian atubele sai esportadór mundiál ida-ne’ebé boot.

Governante ne’e agradese ba serbisu ne’ebé Embaixadór ne’e hala’o ona, durante tinan haat iha Timor-Leste no hatudu vontade iha futuru atu haforsa liután kooperasaun ho Brazíl.

Diplomata reitera apoiu Brazíl nian iha prosesu adezaun Timor-Leste ba Organizasaun Mundiál Komérsiu no afirma katak Timor-Leste sura mós apoiu Brazíl nian iha prosesu adezaun ba ÁZEAN, liuhusi ninia diplomata sira ne’ebé iha país-membru iha Asosiasaun Nasaun Sudeste Aziátiku.

Ministru Prezidénsia Konsellu Ministrus hala’o sorumutuk ho Embaixadór Brazil nian

 

   Ba leten