Governu Timor-Leste

Formasaun intensiva ba profesores kontinua iha loron 12 (sanulo resin rua) fulan Abril no sei ramata iha loron 30 fulan Abril. Formasaun ida ne’e atu kapasita profesores sira nia prátika pedagójika hanorin nian, nebé mak diak liu hosi matérias kurrikulares, atu iha sira nian hanorin sira hatene uza ferramenta servisu nian hanesan manuais eskolares no Guias Professores sira nian no atu dezenvolve prátika pedagójika.

Ministériu Edukasaun hakarak adopta sistema formasaun intensiva professores sira nian nebe hahú ona iha 2008, atu promove profesores nia kapasidade téknika no pedagójika hodi nune’e bele promove ensinu konabá Programas Kurrikulares ho kualidade no hasae taxa susesu.

Ikus liu, modelu avaliasaun dezempeñu iha formasaun intensiva, sei fo ba Ministériu ida ne’e hodi hala’o selesaun ba profesores sira ho kontratu ho termu nebé los , nebé hala’o servisu tinan tolu liu ona no hetan avaliasaun pozitiva iha programa formasaun intensiva nebé hala’o husi Outubro to Dezembru 2009, bele rekonese sira nia esforsu méritu nian no kapasidades, hodi sira profesores sira bele integra hanesan kuadrus permanentes iha Funsaun Públka.

Ministériu Edukasaun oras ne’e dadaun buka oinsá atu haruka rezultadu kompletu programa formasaun ida ne’e ba Komisaun Funsaun Públika, atu hala’o lalais liu prosesu rekrutamentu.

Professores identifikadus iha sistema edukasaun no ensinu total 10409 (rihun sanulo atus hat resin sai), maibe partisipantes iha formasaun intensiva nain 7.409 (rihun hitu atus hat resin sai).

Professores hirak nebé la partisipa iha programa formasaun mak:

• Hirak iha ona Kursu Bacharelato Ensinu nian ne’ebe akreditadu hosi Ministériu ida ne’e;
• Professores iha ona diploma Lisensiatura iha Língua Portuguesa;
• Professores hosi Kursu PROFEP-TIMOR;
• Professores hanorin matéria Relijiaun no Moral;
• Professores voluntárius la hetan saláriu hosi Estadu.

Hosi total Professores partisipantes iha formasaun intensiva, 6745 (rihun nen atus hitu hatnulo resin lima) katak, 91 por sentu hosi professores hetan avaliasaun global pozitiva, kumpri kritérius aprendizajem iha programa nia laran. 664 Professores 664 (atus nen nennulo resin hat), katak 9 por sentu hosi total ne’e, hetan avaliasaun global negativa, la kumpri kriterius aprendizajem iha programa formasaun.