MAPCOMS kompleta loron 100 Governasaun ho lansamentu revista
Ministru Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, hala’o serimónia lansamentu revista ida iha ne’ebé hakerek atividade prinsipál sira husi Governante ne’e nian iha loron 100 dahuluk iha servisu Governu Konstitusionál VIII nian. Serimónia ne’e hala’o iha loron 25 fulan-setembru tinan 2020, iha Auditóriu Ministériu Transportes no Komunikasoins, iha Kaikoli.
Revista ne’e kontempla atividade sira MAPKOMS nian hahú husi simu pose, iha loron 29 fula-maiu to’o loron 8 fulan-setembru tinan 2020.
Durante períodu ida-ne’e, Ministru Francisco Jerónimo, hala’o ona ninia misaun hodi asegura komunikasaun entre Governu no Parlamentu Nasionál, hodi enkamiña ba Governu intervensaun no preokupasaun husi Deputadu sira.
Kona-ba área komunikasaun sosiál nian, Ministru vizita ona instituisaun públika no privada sira hotu komunikasaun sosiál nian ne’ebé lokaliza iha Dili, atu hatene kona-ba ninia difikuldade sira no analiza ba posibilidade apoiu nian husi Governu.
Governante ne’e iha ona mós koordenasaun ho ministériu hotu-hotu, ho objetivu atu aumenta diseminasaun husi ninia atividade sira, liuliu husi programa “Naroman ba Suku”.
Ba tinan 2021, MAPKOMS iha ninia prioridade atu hadi’a infraestrutura sira, ho destake ba ekipamentu dijitalizasaun no ho konstrusaun ba edifísiu foun sira ba Rádiu no Televizaun Timor-Leste (RTTL, EP) no ba Ajénsia TATOLI, IP nian.
Serimónia ne’e konta ho prezensa, entre konvidadu sira seluk, Ministru Edukasaun Juventude no Desportu, Armindo Maia, Ministru Ensinu Superiór, Siénsia no Kultura, Longuinhos dos Santos, Vise-Ministru Administrasaun Estatál, Lino de Jesus Torrezão.
