Governu no Prezidente Repúblika ko’alia kona-ba seguransa iha fronteira

Kin. 10 setembru 2020, 16:51h
118876823_1216124578748940_1825335232440422387_o

Primeiru-Ministru, Taur Matan Ruak, akompaña husi Vise-Primeiru-Ministru, José Reis, Ministra Negósius Estranjeirus no Kooperasaun, Adaljiza Magno, no Ministru Defeza, Filomeno da Paixão de Jesus, hala’o sorumutuk ho Prezidente Repúblika, Francisco Guterres Lú Olo, hodi ko’alia kona-ba kestaun seguransa iha fronteira rai-maran iha ámbitu COVID-19 nian, iha loron 10 fulan-setembru tinan 2020, iha Palásiu Prezidensiál, iha Dili,.

Sorumutuk ne’e ninia objetivu prinsipál mak atu diskute oinsá prevene ema tama tuir dalan ilegál iha país ne’e, hodi evita tranzmisaun COVID-19 nian iha komunidade, tanba sidadaun sira-ne’ebé tama tuir dalan ilegál mai territóriu nasionál, bele infetadu ona ho Korronavírus foun no bele hada’et virus ne’e ba komunidade, hodi provoka situasaun kalamidade públika ida.

Sidadaun sira ne’ebé tama tuir dalan ilegál iha país ne’e, bainhira la sujeita ba kontrolu saúde no ba kuarentena, ho durasaun mínima loron sanulu-resin-haat, ne’ebé impoin husi deklarasaun estadu emerjénsia no husi Dekretu Governu nian ne’ebé aprova ona medida sira ba ninia ezekusaun, sai hanesan ameasa ida ba saúde públika.

Bainhira identifikadu, sidadaun nasionál sira ne’ebé tama tuir dalan ilegál iha nasaun ne’e, sei lori ba kuarentena no sei hetan sansaun, ba fali sidadaun estranjeiru sira ne’ebé autoridade sira kaer toman tama tuir dalan ilegál mai territóriu nasionál, sei haruka fila.

Governu, hamutuk ho Unidade Patrullamentu Fronteira (UPF) no ho apoiu husi FALINTIL-FDTL, haforsa ona seguransa iha fronteira rai-maran tomak no identifika ona fatin barak ne’ebé baibain ema utiliza hanesan dalan ilegál.

Fronteira rai-maran loke loron 17 dala ida, atu garante tempu preparasaun no dezinfesaun ba fatin kuarentena nian sira.

Períodu estadu emerjénsia nian daudaun ne’e vigora to’o tuku 23:59, loron 4 fulan-outubru tinan 2020.

To’o ohin loron, Timor-Leste rejista ona kazu infesaun nian husi Korronavírus foun hamutuk 27, no husi sira-ne’e, na’in 26 maka rekupera ona husi moras ne’e no kazu ativu ida husi pasiente ne’ebé sei iha izolamentu. Daudaun ne’e ema hamutuk 380 maka hela iha kuarentena iha instalasaun Governu nian no ema 142 maka hela iha auto kuarentena.

   Ba leten