Ministru Prezidénsia Konsellu Ministrus hala’o sorumutuk ho Diretór empreza Santos nian iha Timor-Leste
Ministru Prezidénsia Konsellu Ministrus, Fidelis Manuel Leite Magalhães, iha kinta-feira, loron 13 fulan-agostu tinan 2020, simu Diretór empreza petrolífera Santos, Austrália nian, iha Timor-Leste, iha Palásiu Governu, iha Dili.
Santos remata tiha ona akizisaun ativu sira husi ConocoPhillips iha Tasi-Timor, inklui ativu iha mina-matan Bayu Undan nian, iha fulan-maiu liubá, iha tranzasaun ida ho valór dolar amerikanu millaun rihun 1.26. Uluk, Santos iha ona partisipasaun ida iha konsórsiu Bayu Undan nian no, ho akizisaun ida ne’e, empreza ne’e sei hetan partisipasaun hamutuk 68,4% iha unidade projetu ida ne’e nian.
Durante sorumutuk ne’e, Diretór Santos nian iha Timor-Leste esplika ona ba governante ne’e kona-ba mekanizmu sira ba kontrolu no prevensaun COVID-19 ne’ebé aplika ba traballadór sira husi empreza ne’e no dezafiu hirak ne’ebé sira hasoru iha situasaun pandemia Coronavirus foun nian.
José Lobato halo mós aprezentasaun ida kona-ba kompañia ne’e, liuliu kona-ba nia investimentu sira ne’ebé halo iha Timor-Leste.
Santos iha ativu no atividade oioin ligadu ho esplorasaun mina-rai no gás iha Austrália, Timor-Leste no Papua Nova Giné, iha rai-maran (onshore) ka iha tasi-laran (offshore).
Kona-ba unidade husi projetu Bayu Undan nian, nia produsaun no reseita sira boot liu fali planu dezenvolvimentu inisiál nian no empreza ne’e hakarak halo perfurasaun foun balu iha unidade ne’e, atubele hasa’e produsaun.
Timoroan hamutuk ema na’in 343 mak hala’o serbisu iha atividade sira Bayu Undan nian, ne’ebé reprezenta 37% husi totál traballadór iha projetu ne’e.
