Sorumutuk Estraordináriu Konsellu Ministrus nian iha loron 3 fulan-agostu tinan 2020

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Estraordináriu Konsellu Ministrus nian iha loron 3 fulan-agostu tinan 2020 

Konsellu Ministrus hala’o sorumutuk iha Palásiu Governu, iha Dili, no delibera atu propoin ba Sua Exelénsia Señór Prezidente Repúblika, Francisco Guterres Lú Olo, deklarasaun estadu emerjénsia durante loron tolunulu.

Haree ba evolusaun husi situasaun epidemiolójika, ne’ebé hamosu preokupasaun, no ba proliferasaun kazu kontájiu COVID-19 nian ne’ebé rejista to’o agora, tantu iha nivel rejionál no mós iha nivel mundiál, atu nune’e bele neutraliza risku atu SARS-Cov-2 labele da’et no habelar, nune’e proteje saúde públika no kapasidade resposta nian husi Sistema Nasionál Saúde nian, Governu propoin ba Señór Prezidente Repúblika atu, ho deklarasaun estadu emerjénsia, bele permite suspensaun ka restrisaun ba direitu atu halo sirkulasaun internasionál, direitu atu halo sirkulasaun no direitu fiksasaun rezidénsia, no mós direitu rezisténsia nian. Remata

   Ba leten