Lansamentu inisiativa “Rekuperasaun Prosesu Edukativu ho Seguransa”
Lansamentu inisiativa “Rekuperasaun Prosesu Edukativu ho Seguransa ne’e, hala’o ona iha loron 27 fulan-jullu tinan 2020, iha eskola Bázika “Esperança da Pátria”, iha Dili. Inisiativa ne’e, ne’ebé lidera hamutuk husi Ministériu Edukasaun, Juventude no Desportu (MEJD) no husi UNICEF, ninia objetivu mak atu tulun eskola sira hodi estabelese protokolu sira atu loke fali eskola sira ho seguransa.
Inisiativa “Rekuperasaun Prosesu Edukativu ho Seguransa”, ne’ebé inklui kampaña sensibilizasaun nian ida kona-ba prevensaun COVID-19 no distribuisaun ekipamentu sira protesaun no ijiene nian, hetan finansiamentu husi Governu Japaun no Banku Dezenvolvimentu Aziátiku, no ho kontribuisaun husi entidade sira seluk.
Iha loron 29 fulan-jullu, MEJD no UNICEF ne’e, organiza ona kolókiu ida kona-ba tema ida-ne’e, ho partisipasaun husi dirijente no inspetór eskolár sira, husi munisípiu hotu-hotu no Rejiaun Administrativa Espesiál Oekusi Ambenu, hodi debate kona-ba kondisaun sira atu loke fila-fali eskola sira no rekuperasaun prosesu edukativu ho seguransa.
Vise-Ministru Edukasaun, Juventude no Desportu, António Guterres, iha ninia intervensaun iha abertura kolókiu nian, agradese ba UNICEF no ba Ministériu, ba apoiu ne’e no rekoñese kompromisu no kontribuisaun organizasaun ida-ne’e nian, iha kombate hasoru inimigu invizivel COVID-19 no ba kontinuidade husi prosesu aprendizajen prezensiál nian, tuir kritériu sira ne’ebé define tiha ona.
Tuir informasaun sira ikus liu, eskola 1500 resin maka hahú fila-fali ona prosesu edukativu prezensiál, ne’ebé signifika persentajen ida hamutuk 95% iha nivel pré-eskolár no ensinu báziku, no 96% iha nivel ensinu sekundáriu jerál no tékniku-vokasionál sira.
