Sorumutuk Konsellu Ministrus nian loron 24 fulan-Juñu tinan 2020

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian loron 24 fulan-Juñu tinan 2020

Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei kona-ba alterasaun dahuluk ba Dekretu-Lei n.16/ 2020, loron 30 fulan-abríl, kona-ba medida sira atu fó apoiu ba empregu sira iha ámbitu pandemia COVID-19 nian. Tanba situasaun evolui di’ak daudaun, iha planu sanitáriu no epidemiolójiku, no mós iha planu ekonomia nian, ne’ebé neineik-neineik lao normál filafali ona, konsidera katak laiha razaun atu fó nafatin apoiu temporáriu sira ne’ebé kria ho Dekretu-Lei n.16/ 2020, loron 30 fulan-abríl, hafoin fulan-juñu. Nune’e, ho alterasaun ida-ne’e, apoiu sira ne’e aplika ba kontratu sira serbisu nian ne’ebé suspende ona, ka kontratu hirak ne’ebé ninia períodu normál sira serbisu nian hamenus ona iha fulan-marsu, fulan-abríl, fulan-maiu no fulan-juñu tinan 2020, no aplika mós ba kontribuisaun sira atu fó iha fulan hirak ne’e.

Ministru Transportes no Komunikasoins, José Agustinho da Silva, aprezenta ona projetu Dekretu-Lei, ne’ebé hetan ona aprovasaun ho alterasaun sira husi Konsellu Ministrus, kona-ba rejistu nasionál ba roo no embarkasaun sira. Diploma ida-ne’e ninia objetivu mak atu regula rejistu ba roo sira iha Timor-Leste. Ho Dekretu-Lei ida-ne’e, roo no embarkasaun sira-seluk ne’ebé nasionál iha obrigasaun atu halo rejistu hodi bele tau bandeira Timor-Leste nian, hanesan indikasaun kona-ba ninia nasionalidade, no hodi bele navega iha jurizdisaun Timor-Leste nia okos. Rejistu ba roo no embarkasaun sira-seluk ninia objetivu seluk tan mak atu asegura prienximentu rekizitu sira ho natureza téknika no kondisaun seguransa nian sira ne’ebé presiza ba nia navegasaun no protesaun iha ambiente tasi nian, haree ba nia tipolojia.

Konsellu Ministrus aprova ona projetu Rezolusaun Governu nian, ne’ebé Ministru Transportes no Komunikasoins mós maka aprezenta, ne’ebé aprova Polítika no Programa Transporte nian sira. Liga ho objetivu sira ne’ebé define ona iha Planu Estratéjiku Dezenvolvimentu tinan 2011-2030 no ho Objetivu sira husi Dezenvolvimentu Estratéjiku Governu nian, Polítika ba setór transporte sira iha objetivu prinsipál sira hanesan hadi’a kapasidade, abilidade no afetasaun rekursu sira, hadi’a kuadru legál sira hodi satisfás nesesidade kona-ba sistema transporte nian ida ne’ebé modernu, fasilita no fó tulun operasaun ida-ne’ebé efisiente, ne’ebé sei haforsa seguransa no hasa’e tan dezenvolvimentu sósiu-ekonómiku, no hadi’a regulasaun operasionál no jestaun kona-ba sistema transporte nian sira.

Konsellu Ministrus aprova ona projetu Dekretu-Lei, ne’ebé Ministru Interiór iha ezersísiu, Filomeno da Paixão de Jesus, mak aprezenta, kona-ba Regulamentu Dixiplinár Polísia Nasionál Timor-Leste (PNTL) nian. Projetu Dekretu-Lei ida-ne’e ninia objetivu mak atu halo revizaun ba Regulamentu Dixiplinár PNTL nian atuál, ne’ebé aprova ona iha tinan 2004 no daudaun ne’e la atualizadu ona ba nesesidade sira instituisaun nian no ba saida maka sai nu’udar objetivu husi dezenvolvimentu no profisionalizasaun PNTL nian. Regulamentu foun ne’e hakarak fó ba PNTL regra estruturada lubuk ida ne’ebé bele garante dixiplina institusionál no profisionál, atu la’o ba objetivu legál loloos husi polísia moderna ida, ne’ebé kria atu defende sidadaun sira no atu dixiplina relasaun fundamentál moris nian iha sosiedade.

Ezekutivu ne’e aprova ona mós projetu deliberasaun nian ne’ebé fó kompeténsia ba Embaixadór Timor-Leste iha Pekín atu asina akordu ho Repúblika Populár Xina ba fornesimentu asisténsia militár gratuita ba Timor-Leste.

Konsellu Ministrus aprova ona abertura ba prosesu aprovizionamentu nian ba kontratu akizisaun kombustivel ba sentrál elétrika Hera no Betanu nian, ne’ebé Ministru Obras Públikas, Salvador Soares dos Reis Pires maka aprezenta. Prosesu aprovizionamentu nian ida-ne’e ninia objetivu maka atu sosa kombustivel ba produsaun enerjia elétrika ba períodu tinan tolu, husi fulan-dezembru tinan 2020 to’o fulan-dezembru tinan 2023, ne’ebé tuir estimativa, presiza kombustivel litru 428.169.843.

Konsellu Ministrus aprova ona projetu Proposta Lei, ne’ebé Ministru Prezidénsia Konsellu Ministrus, Fidelis Manuel Leite Magalhães, mak aprezenta, ne’ebé halo alterasaun dahuluk ba Lei n. 11/2017, loron 24 fulan-maiu, Lei Migrasaun no Azilu nian. Alterasaun ne’e fó autorizasaun ba Governu atu, liuhusi Rezolusaun, hasai orden atu taka temporariamente postu fronteira nian sira, bainhira iha pandemia ida ka emerjénsia saúde nian ida ho ámbitu internasionál, tuir saida maka hatete iha Regulamentu Sanitáriu Internasionál ne’ebé Organizasaun Mundiál Saúde nian aprova ona. Ho diploma ida-ne’e, Governu bele mós, liuhusi Rezolusaun Governu nian, bandu ema estranjeiru sira atu tama iha Timor-Leste, provizoriamente, bainhira iha nia nasaun orijen, ka iha nasaun sira ne’ebé ema sira-ne’e halo tránzitu bainhira halo viajen, eziste surtu ruma husi kazu moras sira ne’ebé, tanba nia grau hada’et nian, liuhusi infesaun ka kontaminasaun, bele fó risku ida ba saúde públika nian, bainhira importa mai territóriu nasionál.

Konsellu Ministrus aprova ona Projetu Proposta Lei, ne’ebé Ministru Prezidénsia Konsellu Ministrus mós mak aprezenta, kona-ba alterasaun dahuluk ba Lei n. 10/2004, loron 24 fulan-novembru, Lei kona-ba Sistema Saúde. Ho alterasaun ida-ne’e, fó ona ba autoridade sira-ne’ebé kompetente iha matéria vijilánsia epidemiolójika no sanitária atu uza mekanizmu sira kona-ba protesaun saúde públika, atu bele evita no neutraliza risku atu moras ne’e da’et habelar iha populasaun nia leet. Entre medida protesaun saúde públika nian hirak ne’ebé hatete iha diploma ne’e, inklui posibilidade atu obriga kualkér ema atu halo ezame médiku no posibilidade, iha kazu suspeita moras ne’ebé inklui iha lista ne’ebé prevee iha lei ka regulamentu administrativu, atu halo internamentu ka tratamentu kompulsivu, izolamentu no kuarentena. Iha situasaun katástrofe ka emerjénsia saúde nian ne’ebé grave, bele mós hasai orden kona-ba kuarentena iha uma.

Ikusliu, Sekretária Estadu ba Igualdade no Inkluzaun, Maria José Fonseca Monteiro de Jesus, halo aprezentasaun ida ba Konsellu Ministrus, kona-ba relatóriu anuál tinan 2019 nian, ne’ebé relasiona ho planu asaun nasionál kontra violénsia bazeia ba jéneru. Planu ne’e hatuur iha pilár haat, liuliu prevensaun violénsia bazeia ba jéneru, prestasaun servisu esensiál sira ba vítima violénsia nian sira, asesu ba justisa no koordenasaun, monitorizasaun no avaliasaun. Relatóriu ne’e aprezenta mós  rekomendasaun prinsipál sira kona-ba asaun sira ne’ebé sei implementa tuir pilár ida-idak, hanesan sensibilizasaun ba populasaun no instituisaun ba kestaun jéneru, hadi’a asesu vítima sira-nian ba saúde no abrigu sira, hadi’a setór judisiáriu no enkuadramentu legál atu proteje vítima sira no hadi’a koordenasaun institusionál. Remata  

   Ba leten