Governu hato’o nia solidariedade ba Austrália
Prezidénsia Konsellu Ministrus
VIII Governu Konstitusionál
...........................................................................................................................
Loron 14, fulan-janeiru, tinan 2020
Komunikadu Imprensa
Governu hato’o nia solidariedade ba Austrália
Lori povu Timor-Leste nia naran, Governu hato’o nia profunda solidariedade ba Povu no Governu Austrália, ne’ebé durante fulan tolu resin hasoru inséndiu barak no maka’as tebtebes.
Ahi ne’ebé kontinua han, la iha rohan, hahú husi kedas fulan-setembru nia rohan tinan 2019, kuaze iha territóriu Austrália laran tomak, konsege estraga área floresta lubun boot ida, ne’ebé afeta ektare millaun ba millaun, kauza pelumenus ema na’in 25 maka mate, ema besik atus ida maka lakon, populasaun barak izolada, uma rihun ba rihun mak ahi han, animál rihun atus mak mate no espésie barak mak iha risku estinsaun nian.
Governu Timor-Leste hato’o ninia sentida kondolénsia ba família vítima sira no hahi’i autoridade sira-nia serbisu hodi kombate ahi no salva ema no animál sira, iha situasaun ne’ebé difisil tebes.
Portavós Governu Konstitusionál VIII, Ministru Estadu, Agio Pereira, afirma katak “ ami-nia sentimentu ba família sira ne’ebé lakon nia parente sira no ami agradese ba sira ne’ebé esforsu nafatin hodi kombate ahi no fó apoiu ba populasaun sira ne’ebé afetada ba katástrofe ne’e”. Remata
