Inísiu husi audiénsia públika sira kona-ba apresiasaun ba OJE tinan 2020 nian

Seg. 28 outubru 2019, 09:21h
599112

Hahú ona iha segunda, loron 28 fulan-outubru tinan 2019, siklu audiénsia públika sira ne’ebé maka Komisaun Espesializada Permanente sira iha Parlamentu Nasionál hala’o atu apresia no elabora relatóriu no paresér ba Proposta Lei kona-ba Orsamentu Jerál Estadu nian (OJE) ba tinan 2020.

Audiénsia públika sira-ne’e sei hala’o to’o loron 6 fulan-novembru, no durante periodu ida-ne’e, Komisaun sira sei simu membru Governu, Prezidénsia Repúblika, Dirijente Administrasaun Públika nian sira no reprezentante sosiedade sivíl nian sira atu halo debate no fó klarifikasaun kona-ba orsamentu ba tinan finanseiru 2020 nian ne’e.

Hafoin audiénsia sira-ne’e, sei prepara relatóriu no paresér ne’ebé sei diskute iha Sesaun Plenária kona-ba Proposta Lei OJE tinan 2020 nian. Sesaun Plenária ne’e sei hahú ho diskusaun no votasaun iha jeneralidade, iha loron 21, 22 no 25 fulan-novembru. Diskusaun no votasaun iha espesialidade no votasaun finál globál sei hala’o husi loron 26 fulan-novembru to’o loron 10 fulan-dezembru. Redasaun finál, hein katak, sei envia ba Prezidente Repúblika iha loron 11 fulan-novembru.

Proposta OJE, ho valór totál dolar amerikanu millaun rihun 1,95 ne’e, hetan aprovasaun husi Konsellu Ministrus iha sorumutuk iha loron 2 fulan-outubru tinan 2019 no Governu entrega ona ba Parlamentu Nasionál iha loron 16 fulan-outubru.

   Ba leten