Governu Timor-Leste

loron 17 stembru-2019 - Ministériu Reforma Lejislativa no Asuntu Parlamentár nia Gabinete Inovasaun Administratriva (GIA) realiza tersafeira ne’e no aban kuartafeira Kolokiu Konsultasaun ida kona-ba Programa Reforma Administrasaun Publika atu avansa ho Dezenvolvimentu Roteiru (Roadmap) Reforma Liñas Ministeriu sira nian, hamutuk ho Diretores-Jerais no Diretores Nasionais nomós liñas ministériu sira hotu iha Salaun MSSI, Caicoli.

Prosesu ida-ne'e nu’udar Atividade Lansamentu ba Programa Reforma Administrasaun Publika husi Governu Timor-Leste, tamba PRAP ne'e hanesan programa prioritariu VIII Governu Konstitusional nian ba tinan 5, 2019 - 2023.

Sorumutu daudauk ne’e mak tarjetu ba ajénsia Estadu sira-nian atu kria sensibilizasaun kona-bá Programa RAP ne’e, hodi ministériu sira rasik identifika prioridades reforma husi kada ministériu. Prosesu ida-ne’e mós atu promove ministériu ida idak atu kria sira-nia primeiru esbosu mapeamentu reforma sira-ne’e. Liñas ministeriais sira sei estabelese grupu de traballu no indika pontu fokal sira ba kada área reforma. Númeru reprezentante husi liña ministériu sira iha kolokiu ne’e besik ema nain 50 mak partisipa, hamutuk ho reprezentante sira husi GIA rasik nomos tékniku sira seluk MRLAP nian.

Programa Reforma Administrasaun Pública ne’e aprezenta tiha ona fulan-Agostu kotuk ne'e iha Konsellu de Ministrus, ne’ebé ministrus sira hato’o mai nia apoiu. Agora dadaun GIA haluan prosesu organizasaun ho kuadros superior sira Administrasaun Públika nian, konaba prosesu implementasaun PRAP nian.

Semana oin mai GIA mós sei organiza kolókiu daruak konaba asuntu hanesan, ne’ebé tarjetu mak Parseiru Dezenvolvimentu, seitor privadu no reprezentante sira husi sosiedade sivíl.