Governu Timor-Leste

Iha loron 5 fulan-setembru tinan 2019, Vise-Ministru Dezenvolvimentu Estratéjiku Saúde nian, Bonifácio Maucoli dos Reis, akompaña hosi Embaixadór Austrália nian iha Timor-Leste, Peter Roberts, ofisialmente inaugura ofisina ambulánsia sira nian iha Ospitál Referénsia Maubisi, Munisípiu Ainaru.

Iha ninia diskursu, Ukun-na’in ne’e agradese ba kooperasaun no apoiu ne’ebé Governu Australianu oferese liuhusi ninia Embaixada iha Timor-Leste, iha asaun solidariedade ida ne’e, ne’ebé buka atu hametin Sistema Nasionál Saúde (SNS), hadi’a saúde populasaun nian no promove moris saudavel iha nivel Nasionál, Munisipál, Postu Administrativu, Suku no Aldeia sira.

“Servisu emerjénsia nian no ambulánsia sai nu’udar pilár ida importante iha prestasaun servisu asisténsia saúde ba Povu Timor-Leste. Servisu ne’e inklui iha Planu Estratéjiku Nasionál Setór Saúde nian (PENSS). Dadaun ne’e, Ministériu Saúde iha ambulánsia 46, ne’ebé 12 avaria hela, no ambulánsia multifunsaun 88, maibé 20 avaria hela.

Tuir planu tinan ne’e nian, Ministériu Saúde sei sosa tan ambulánsia 16 atu fó apoiu ba servisu emerjénsia iha territóriu nasionál”, dehan Vise-Ministru.

Bonifácio Maucoli dos Reis hatutan katak, Ministériu Saúde valoriza apoiu tékniku ne’ebé fornese hosi Governu Austrália no hein katak Ministériu Saúde kontinua servisu ho Embaixada Austrália, ho Departamentu Governamentál Austrália nian ba Negósius Estranjeirus no Komérsiu (DFAT – akrónimu iha lian inglés) no ho programa kooperasaun Austrália nian Parseria ba Dezenvolvimentu Umanu (PHD – sigla iha lian inglés) hodi masimiza apoiu ba programa nasionál iha setór saúde ba tinan lima oin mai.

Serimónia ne’e konta mós ho prezensa hosi Diretór-Jerál Servisus Korporativus, Vitor Soares Martins, Inspetór Saúde, Natalino Araújo, Diretór Nasionál Jestaun no Finansas, Marcelo Amaral, Diretór Nasionál Administrasaun Lojístika no Patrimóniu, Francisco Borges, Diretór Nasionál Apoiu Ospitalár, Horácio Sarmento, Diretora Ezekutiva Ospitál Referénsia Maubisse, Gabriela da Conceição Magno Pereira, Diretór Servisu Saúde Munisípiu (SSM) Ainaru, Agostinho da Costa, Diretora Klínika Saun Joaquim Maubisse, funsionáriu setór saúde no konvidadu sira seluk.