Timor-Leste Sei Simu Misaun Téknika ASEAN Hodi Avalia Nasaun nia Prontidaun
Dili, Timor-Leste (22 Agostu, 2019) – Loron ha’at hafoin Timor-Leste selebra tinan 20 Konsulta Popular, nasaun ne’e sei simu Misaun Téknika bo’ot ida husi ASEAN hodi avalia nia preparasaun ba adezaun ba ASEAN. Ekipa ne’e sei vizita Dili iha loron 3-6 Setembru 2019.
Delegasaun ne’ebé kompostu husi Líder SOM ASEAN no Komisaun Reprezentante Permanente husi Membru Estadu ASEAN no mos ho Ofisiál sira husi Sekretariadu ASEAN ne’e, sei hasoru malu ho reprezentante tékniku husi liña-ministerial sira no mos ho líder máximu sira iha nasaun ne’e, inklui Primeiru Ministru, Prezidente Parlamentu, Prezidente Repúblika, no pesoa eminente sira seluk.
Vizita importante ne’e akontese hafoin tinan barak nia laran Timor-Leste expresa nia interese hodi sai membru ASEAN iha Marsu 2011. Tinan 8 liu ona, nasaun ne’e sei konsidera adezaun ba ASEAN hanesan prioridade nasionál. Esforsu atu sai membru ASEAN mos lidera husi nível-altu Governu nian. Nasaun halo ona preparasaun no progresu barak hodi asegura nia prontidaun, inklui iha area téknika sira.
Enkuantu Timor-Leste prepara atu simu Misaun Téknika husi ASEAN, nasaun ne’e kontinua ho optimizmu hodi hateke ba oin no kontinua kria relasaun diak ho nasaun viziñu sira. Timor-Leste hein katak adezaun ne’e sei la lori de’it benefísiu ba Timor-Leste, maibe sei lori mos benefísiu ba rejiaun ASEAN tomak.
