Governu Timor-Leste

Timor-Leste partisipa, husi loron 11 to’o 14 fulan-jullu, iha eventu Pacific Exposition, ne’ebé akontese ba dala uluk iha tinan 2019. Eventu ne’e,  hala’o iha Auckland, iha Zelándia Foun, no halibur nasaun hamutuk 19 husi rejiaun pasífiku nian. Eventu ida-ne’e dedika ba komérsiu, investimentu no turizmu, ne’ebé sei promove oportunidade ekonómika iha nasaun sira husi Pasífiku Súl. Eventu ne’e organiza husi Embaixada Repúblika Indonézia nian iha Zelándia Foun, Samoa no Tonga, ho apoiu husi Governu Zelándia Foun no Governu Austrália, ho objetivu atu hametin relasaun kooperasaun rejionál nian no fahe esperiénsia kona-ba komérsiu, turizmu, investimentu no kultura ba dezenvolvimentu ekonómiku país sira rejiaun ne’e nian.

Delegasaun Timor-Leste nian, lidera husi Sekretáriu Estadu Kooperativas, Arsénio Pereira, konta ho prezensa husi Embaixadór Timor-Leste nian iha Zelándia Foun, Cristiano da Costa, no Diretór-Jerál Turizmu, husi Ministériu Turizmu, Komérsiu no Indústria, José Quintas, Diretór Relasaun Esterna no Marketing, TradeInvest nian, no reprezentante sira husi Gabinete Ministru Koordenadór Asuntus Ekonómikus no Sekretária Estadu Arte no Kultura nian.

Marka mós prezensa iha Pacific Exposition 2019, aleinde Timor-Leste, maka Austrália, Estadus Federadus Mikronézia, Fiji, Illas Cook, Illa Marshall, Illa Salomaun, Indonézia, Nauru, Niue, Kaledónia Foun, Zelándia Foun, Palau, Papua Giné Foun, Polinézia Franseza, Kiribati, Samoa no Tuvalu.

Iha loron dahuluk eventu ne’e nian, hala’o forum turizmu nian ida, ho sesaun tolu ne’ebé foti tema “Melloria Konetividade nian iha Destinu Turístiku sira”, “Kriasaun Marka Turizmu nian ida ba Pasífiku” no “Dezenvolvimentu Kapitál Umanu iha Área Turizmu nian”. Sesaun dahuluk ne’e konta ho partisipasaun husi Diretór-Jerál, José Quintas, iha sesaun ida-ne’ebé partisipante sira ko’alia kona-ba nesesidade atu hadi’a infraestrutura públika sira, liu-liu iha nivel konetividade, ho nesesidade atu hadi’a kondisaun estrada, aeroportu no portu sira iha rejiaun pasífiku nian.

Iha loron daruak eventu ne’e nian, hafoin abertura ofisiál, inaugura mós espozisaun ho tenda 39 husi nasaun no empreza 19 hosi rejiaun ne’e. Ida-ne’e liutiha, komesa ho Forum negósiu no investimentu nian ne’ebé konta ho partisipasaun husi Sekretáriu Estadu Kooperativa no Diretór TradeInvest. Ho tema “Promove Parseria sira ba Komérsiu no Investimentu iha Rejiaun Pasífiku nian liuhusi Hadi’a Konetividade, Integrasaun iha Merkadu no Dezenvolvimentu Infraestrutura nian”, Forum Negósiu no Investimentu nian ne’e hakarak dezenvolve potensialidade komérsiu nian ne’ebé seidauk dezenvolve iha Rejiaun Pasífiku nian.

Iha loron datoluk eventu ne’e nian, hala’o mós Forum Kulturál ida, ne’ebé konta ho partisipasaun husi reprezentante ida husi Sekretaria Estadu Arte no Kultura, Cláudio Cabral. Forum kulturál ne’e ninia objetivu mak atu estabelese kooperasaun sustentavel ida iha kampu kultura nian no haforsa identidade Pasífiku nian ida iha komunidade globál. Tema prinsipál ida-ne’e fahe ba sub-tema haat hanesan tuirmai ne’e: “Hatene tuir Orijen no Istória kona-ba Identidade Kulturál entre Nasaun sira iha Pasífiku”; “Komunidade no Diferensa: Dalan ida ba Nomeasaun Multinasionál Hamutuk kona-ba Patrimóniu Kulturál Imateriál UNESCO nian”; “Promove Protesaun ba Patrimóniu Kulturál Sub-akuátiku iha Rejiaun Pasífiku”, no “Ita-nia Kultura ba Futuru: avansu indústria kriativa nian iha rejiaun Pasífiku nian”.

Durante eventu loron haat ne’e nian, hala’o eventu kulturál oioin, ho konsertu no aprezentasaun reprezentativa sira husi eransa kulturál hosi delegasaun oioin. Iha loron ikus Pacific Exposition 2019 nian, Timor-Leste maka sei aprezenta nia dansa tradisionál no kultura ho performance hosi reprezentante ida husi Grupu Santo António.