Governu Timor-Leste

Ministra Edukasaun Juventude no Desportu (MEJD), Dulce de Jesus Soares, akompaña hosi Diretór Eskola São Pedro, Pe. Adérito M.E.V. da Costa, SDB lansa, iha loron 16 fulan-maiu tinan 2019  biblioteka iha liña eskola São Pedro ho sítiu https://saunpedro.education/, iha Comoro, Díli.

Iha nia diskursu, Ministra Edukasaun, Dulce de Jesus Soares, hateten,  lansamentu sítiu   ne’e, bele ajuda estudante sira atu lee livru hirak-ne’ebé mak tau iha biblioteka, buka referénsia hodi aprende liután no mós halo peskiza ba siénsia.

“Agradese no parabéns ba eskola são pedro ne’ebé estabelese ona teknolójia inovativu hodi utiliza ba  prosesu aprendizajen.

Diretór Eskola São Pedro, Pe. Adérito da Costa informa, website ne’e mós loke ba públiku hotu atu bele asesu, liuliu estudante iha Timór laran ne’ebé utiliza internet no mós telefone android hodi bele buka informasaun, livru, siénsia no seluk tan.

Resposavel ba Eskola hatutan tan, atu kria inovasaun no buat di’ak ba eskola no ba estudante persiza inan –aman sira-nia forsa no kontribuisaun atu bele realiza buat ne’ebé mak  eskola atu halo.

“Agradese ba inan-aman sira-ne’ebé mak kontribui ona ba estabelesimentu sítiu iha liña ne’ebé kria husi, Elisio Freitas, hanesan antigu alunu Saleziano Dom Bosco.