Ministériu Saúde Inaugura Sentru Maternidade Vera Cruz
Vise-Ministru ba Dezenvolvimentu Estratéjiku Saúde, Bonifácio Maucoli dos Reis no Diretora Ajénsia Kooperasaun Norte-Amerikana (USAID), Diana Putman, hala’o enseramentu misaun pacific partnership (PP-19) no hala’o mós inaugurasaun ba fatin sentru maternidade vera-Cruz iha Caicoli Díli.
Iha ninia diskursu Vise-Ministru elojia ekipa boot hosi Forsa Naval, Estadus Unidus nian ho sira-nia disponibilidade hodi mai Timor-Leste durante semana ida ho balun (hahú hosi loron 23 fulan-abril to’o loron 2 fulan-maiu 2019), atu halo renovasaun no apoiu ba konstrusaun unidade saúde iha Munisípiu Díli no Liquiça.
“Ami-nia sentidu profunda gratidaun ba apoiu no kooperasaun ne’ebé maka povu no Governu hosi Amerika fó liu husi Embaixada Estadus Unidus Amerika iha Timor-Leste”.
Governu rekoñese katak kolaborasaun no kooperasaun ho parseiru dezenvolvimentu sira, hanesan ajénsia Nasoins Unidas, ajénsia doadores, pertinente atu alkansa vizaun, misaun no meta ne’ebé define tiha ona iha Planu Estratéjiku Dezenvolvimentu Nasionál, setór saúde tinan 2011-2030.
“Ha’u hein katak, ita-nia profisionál saúde bele hetan benefisiu hosi transferénsia ka inter-kambiu ba siénsia no koñesimentu teknolojia, no bele implementa saida mak sira aprende no mós katak konstrusaun no reabilitasaun ida-ne’e bele fó benefisius ba ita-nia komunidade”, hatete Vise-Ministru.
