SEKOMS no SEII Hala’o Formasaun ba Jornalista Editór no Xefe Redasun Sira
Sekretaria Estadu Komunikasaun Sosiál (SEKOMS) servisu hamutuk Sekretaria Estadu ba Igualdade no Inkluzaun (SEII) hala’o formasaun ba Editór no Xefe Redasaun sira, ho tema “Mídia mós bele prevene violénsia hasoru feto” formasaun ne’e hala’o durante loron lima hahú hosi loron 8 to’o 12 fulan-outobru tinan 2018, iha salaun Maria Gorrete, Obrigado Barak, Dili.
Tuir Sekretáriu Estadu Komunikasaun Sosiál (SEKOMS), Mericio Juvenal dos Reis (Akara) katak, objetivu hosi formasaun ida ne’e atu hasa’e koñesimentu Jornalista no xefe redasaun sira iha area igualdade jéneru, prevensaun ba violénsia hasoru feto no enkudramentu legál iha Timor-Leste atu hadi’a reportajen, kobertura jornalista nian ba promove Igualdade Jéneru no prevensaun ba violénsia hasoru feto, atu hametin kooperasaun entre entidade governu, sosiedade sívil no institusaun media sira.
Iha fatin hanesan, Sekretária Estadu ba Igualdade no Inkluzaun (SEII), Maria José Fonseca Monteiro de Jesus hateten, formasaun ida ne’e atu asegura reportajen, artigu ne’ebé jornalista hatun liu hosi media oi-oin ne’ebé iha bele sensivél ba jéneru no mós bele ajuda atu halo prevensaun ba violénsia bazeia ba jéneru. bele mós inklui violénsia doméstika tanba iha uma laran normalmente ita haoin feto mak hetan violénsia maibé labarik sira mós iha uma laran hola parte hosi familia dalaruma labarik kiik mós hetan violénsia, tanba ne’e, aleinde formasaun sensivél ba jéneru maibé ita hanesan média uza ita-nia dalan ne’ebé ita iha liu hosi hala’o ita-nia knar atu mós halo prevensaun ba violénsia bazeia ba jéneru no mós violénsia doméstika tanba Jornalista mak iha knar ne’ebé mak importante tébes, hodi hato’o informasaun ho lolos ba iha sosiedade.
