Omenajen ba jornalista australianu na’in lima ne’ebé mate iha Balibó
Sekretáriu Estadu Konsellu Ministrus no Komunikasaun Sosiál, Matias Boavida, partisipa iha serimónia ne’ebé organiza husi Asosiasaun Jornalista Timor-Leste (AJTL) hodi fó omenajen ba jornalista australianu na’in lima ne’ebé mate iha Balibó, iha fulan-outubru tinan 1975, durante operasaun militár indonézia ne’ebé molok halo okupasaun iha Timor-Leste. Inisiativa ne’e hala’o iha loron 21 fulan-outubru tinan 2017, iha fatin ne’ebé akontese masakre ne’e iha rai-ketan.
Sekretáriu Estadu hatete katak serimónia ne’e ho objetivu atu fó omenajen ba jornalista sira ne’ebé sakrefika ona sira-nia vida, hodi fó sai informasaun kona-ba luta timoroan nian ba mundu tomak. Matias Boavida hatutan tan katak, importánsia husi informasaun no serbisu nian ne’ebé maka dezenvolve ona husi jornalista sira, “ne’ebé laiha fronteira”.
Prezidente AJTL nian, David Hugo, lori Asosiasaun nia naran fó mós omenajen ba jornalista na’in lima ne’e, no entrega mós ai-han ba inan faluk timoroan ida ne’ebé moris ho difikuldade.
Marka prezensa iha serimónia ne’e, Sekretáriu Estadu Konsellu Ministrus no Komunikasaun Sosiál, autoridade lokál sira, Komandante Polísia Munisípiu Balibó nian no reprezentante husi komunidade sira nian.
