Governu Timor-Leste

Diresaun Nasionál Risku Dezastre nian husi Ministériu Solidariedade Sosiál hala’o ona sorumutuk ida kona-ba dezenvolvimentu projetu koridór estrada Dili-Ainaru, liuhusi kooperasaun ho Programa Dezenvolvimentu Nasoins Unidas nian (PNUD) no ministériu relevante sira, iha loron 10 fulan-jullu, iha Timor Plaza, iha Dili.

Projetu ne’e, ne’ebé hetan aprovasaun iha fulan-agostu tinan 2014, ninia objetivu maka atu aumenta kapasidade husi komunidade sira ne’ebé hela besik estrada ne’ebé liga Dili no Ainaru atu hamenus impaktu husi katástrofe naturál – liuliu, rai-monu no inundasaun ne’ebé akontese tinan-tinan. Dezenvolve ona asaun formasaun nian ba komunidade sira husi suku besik 26 no projetu ne’e sei remata iha fulan-outubru tinan ne’e.

Iha sorumutuk ne’e, aprezenta ona mós manuál “Jestaun risku dezastre sira ninian”, ne’ebé importante tebes nu’udar Ministra Solidariedade Sosiál, Isabel Amaral Guterres, hateten: “tinan-tinan akontese rai-monu, inundasaun, anin boot no, bazeia ba informasaun ne’ebé hakerek iha manuál ne’e, iha posibilidade atu elabora planu ida ne’ebé kompletu liu atu hamenus risku dezastre naturál sira nian iha país ne’e.” 

Ministra ne’e hatutan katak manuál ne’e fó benefísiu ba komunidade sira ne’ebé hela besik koridór estrada Dili-Ainaru, nune’e mós investigadór sira.

Marka prezensa iha sorumutuk ne’e maka Diretór Nasionál PNUD nian, Knut Ostby, Diretór-Jerál sira, Diretór Nasionál sira no Xefe Departamentu sira husi Ministériu Solidariedade Sosiál, nune’e mós membru sira husi Ministériu sira seluk nian.