Governu selebra Loron Nasionál Saúde nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 20 fulan-jullu tinan 2017
Governu selebra Loron Nasionál Saúde nian
Aleinde sai hanesan loron eleisaun parlamentár nian, sábadu ida-ne’e, loron 22 fulan-jullu, sai mós hanesan Loron Nasionál Saúde nian. Iha eventu barak maka kontinua hala’o durante fulan-jullu hodi selebra loron importante ida-ne’e, ne’ebé ofisialmente determina ona husi Rezolusaun Governu nian, iha fulan-fevereiru tinan ida-ne’e.
Ba selebrasaun dahuluk Loron Nasionál Saúde nian ida-ne’e, Ministériu Saúde organiza ona atividade hirak ne’ebé liga ba tema: Hakbesik servisu saúde nian sira ba família, fó kualidade moris nian ne’ebé di’ak liu ba ema”. Entre atividade sira-ne’e inklui doasaun ran no teste jerál iha ospitál sira hotu, edukasaun no sensibilizasaun liuhusi meiu komunikasaun nian sira, eventu kulturál no desportivu sira, Semináriu Sientífiku ida ne’ebé hala’o iha loron 27 no 28 fulan-jullu, no entrega prémiu oin-oin kona-ba rekoñesimentu ba dezempeñu profisionál ba traballadór sira iha setór Saúde nian.
Loron 22 fulan-jullu hili ona hanesan Loron Nasionál Saúde, tanba iha data ida-ne’e maka lansa programa “Saúde iha Família”, iha tinan 2015. Programa ida-ne’e, ne’ebé haruka ekipa médika sira (kompostu husi médiku ida, enfermeira/u no parteira ida) ba agregadu familiár ida-idak nia uma, transforma daudaun kuidadu saúde primáriu iha nivel nasionál. Iha fulan-maiu tinan ida-ne’e nian, Primeiru-Ministru, Rui Maria de Araújo, informa ona katak ekipa médika vizita ona 90% husi agregadu familiár sira iha Timor-Leste no halo ona rejistu individuál saúde nian ba 84% husi populasaun.
Mandatu Governu Konstitusionál VI haree ona konkista boot barak iha área saúde nian. Entre konkista hirak ne’e maka kampaña nasionál kona-ba imunizasaun kontra sarampu, rubéola no poliomielite, ne’ebé abranje besik 96% husi labarik ho idade tinan 15 ba kraik; introdusaun Rejime Kontrolu Tabaku nian; inaugurasaun Ospitál Rejionál Baukau Eduardu Ximenes; no Programa Nasionál kontra Malária ne’ebé hetan susesu estraordináriu, ne’ebé tau Timor-Leste besik ba “faze atu halakon” moras ne’e.
Estudu boot ida ne’ebé maka lansa husi Nasoins Unidas iha tinan kotuk, no públika ona revista médika The Lancet, klasifika ona Timor-Leste hanesan país ida ne’ebé hetan progresu maka’as liu, husi nasaun hamutuk 188 ne’ebé hetan análize ona, iha indikadór sira husi Objetivu sira husi Dezenvolvimentu Sustentavel kona-ba meta sira saúde nian, iha períodu tinan 2000-2015.
Portavós, Ministru Estadu Agio Perreira, observa katak “maske Loron Nasionál Saúde iha tinan ida-ne’e lakon vizibilidade tanba ita-nia eleisaun parlamentár, ami hakarak sauda ho entuziazmu serbisu husi ita-nia profesionál sira iha área ida-ne’e, komemora ita-nia konkista boot sira no garante kontinuidade ba ita-nia esforsu sira atu lori servisu saúde nian ba família sira no fó ba sira kualidade moris nian”. REMATA
