Sorumutuk Konsellu Ministrus nian iha loron 18 fulan-jullu tinan 2017
Prezidénsia Konsellu Ministrus
VI Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian iha loron 18 fulan-jullu tinan 2017
Konsellu-Ministrus hala’o sorumutuk iha loron-tersa ne’e, iha Palásiu Governu, iha Dili, no Ministru Estadu, Koordenadór Asuntus Sosiais no Ministru Edukasaun aprezenta ona relatóriu ida kona-ba análize setoriál Edukasaun nian. Halo hamutuk ho Banku Mundiál, dokumentu ida-ne’e, ne’ebé sei iha faze preliminár, hakarak atu halo estudu kle’an ida kona-ba estadu atuál setór ne’e nian, ne’ebé importante tebes ba futuru nasaun nian.
Sei iha kampu Edukasaun nian, aprezenta ona mós Rezolusaun Governu nian kona-ba ezekusaun polítika dezenvolvimentu labarik sira nian iha infánsia dahuluk, to’o idade tinan ualu. Polítika ida-ne’e, ne’ebé koordena ho Planu Estratéjiku Dezenvolvimentu tinan 2011-2030 nian, intervein hamutuk iha área Saúde, Nutrisaun, Edukasaun no Protesaun Sosiál, hodi kontribui ba redusaun moris-kiak nian no dezenvolvimentu ekonómiku no sosiál. Polítika ne’e elabora husi Governu liuhusi prosesu kolaborativu ida, iha ne’ebé inklui inan-aman, família no profisionál sira ne’ebé envolve, atu garante futuru ida ne’ebé di’ak liu ba labarik timoroan sira.
18 fulan-jullu tinan 2017
