Governu Timor-Leste

Prezidente Repúblika, Francisco Guterres Lú-Olo halo inaugurasaun ba ponte Noefefan iha rejiaun administrativa Oekusi Ambenu nian, iha loron 10 fulan-juñu tinan 2017. Eventu ida ne’e hetan partisipasaun husi Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál, Dionísio Babo Soares hanesan reprezentante husi Primeiru-Ministru.

Iha diskursu Prezidente Repúblika nian, nia hateten katak, Oekusi Ambenu fó ona mai-ita hanoin foun sira ba dezenvolvimentu. Hodi hasi Oekusi husi izolamentu, ita persiza investe iha meius transporte, hodi hasa’e movimentu komunidade sira-nian ho ró ida, aviaun no ponte  ne’ebé hetan ona inaugurasaun.

Ponte Noefefan hala’o husi kompañia Internasional PT Ady Karya, ho durasaun tinan 1 fulan 6 ho nia naruk metru 380 no nia luan metru 6. Valór totál husi konstrusaun nian hamutuk millaun dolar amerikanu $ 17. Ponte ida ne’e bele liga ona komunidade husi suku Bene-Ufe, Usi-Taco, Suni-Ufe, Taiboco no parte balun iha suku Lifau nian.

Ekonomia sosiál merkadu, hanesan polítika ne’ebé hili ona husi Autoridade sira Oekusi Ambenu nian ba zona ne’e hodi hala’o dezenvolvimentu ida globál, inkluzivu no inovadór, kreativu no sustentavel. Planu no prosesu hotu dezenvolvimentu nian haree ba fatór hirak ne’e. Ita hein katak uma-kain hotu-hotu sei kontribui hodi hasa’e rendimentu rejiaun nian.

Prezidente Lú Olo koa’lia liután katak Zona Espesiál Ekonomia Sosiál Merkadu (iha Oekusi-Ambenu) sei sai nu’udar referénsia ida ba povu no bele aumenta ba dezenvolvimentu sira seluk ne’ebé oras ne’e harii hela iha Timor-Leste.

Presidente Zona Espesiál Ekonomia Sosiál Merkadu (ZEESM) nian Mari bin Alkatiri fó hanoin katak ponte ne’ebé oras ne’e inaugura ona hahú iha fulan-abríl tinan 2015, ne’ebé hahú tarde liu tiha fulan lima tuir planu ne’ebé maka halo ona, no ho durasaun tinan 100. Infraestrutura ida ne’e sei fasilita movimentu komunidade nian no nune’e mós hodi promove produsaun rai-laran no atrai investimentu rai-li’ur. 

Komunidade lokál sira hatudu sira-nia laran haksolok ho konstrusaun ida ne’e hodi agradese ba Governu Lokál, tanba fasilita ona sira-nia deslokasaun.

Marka prezensa iha inaugurasaun ida ne’e Vise-Ministru Administrasaun Estatál, Tomás do Rosario Cabral, Vise-Ministru Obras Públika, Transportes no Komunikasaun I, Januário da Costa Pereira, Vise-Ministru Obras Públikas Transportes no Komunikasoens II, Inácio Moreira, Xefe Estadu Maiór Jenerál F-FDTL Majór Jenerál Lere Anan Timur, Pároku Nunbey Padyai nian, Padre Abílio Ricardo, Deputadu sira no membru sira hotu komunidade Oekusi Ambenu nian.