Governu Timor-Leste

Ministru Estadu no Prezidénsia Konsellu Ministru no

  Portavós ofisiál Governu Timor-Leste

 Díli, loron 21 fulan-abril tinan 2017

Governu tulun sorumutuk sira entre veteranu timoroan sira no veteranu australianu sira

Semana ida ne’e, veteranu sira husi luta ba independénsia Timor-Leste nian bá Austrália atu hasoru malu ho membru sira komunidade veteranu sira Austrália nian, vizita organizasaun sira ne’ebé fó tulun ba veteranu sira no atu partisipa iha komemorasaun Loron ANZAC nian – Korpu Espedisaun Austrália no Zelándia Foun nian iha Funu Mundiál I, ne’ebé sei hala’o iha loron 25 fulan-abríl. Veteranu timoroan sira barak liu maka mai husi sira ne’ebé uluk sai membru FALINTIL – Forsa Armada Libertasaun no Independénsia Timor-Leste, ne’ebé luta ona iha ai-laran durante okupasaun indonézia. Ida ne’e sai hanesan vizita dahaat nian husi sira vizita sira uluk ne’ebé sira halo tiha ona, ho objetivu atu dezenvolve lasu amizade nian sira, entre veteranu sira husi nasaun rua ne’e.

Tinan ida-ne’e, delegasaun lidera husi Prezidente eleitu, Francisco Guterres “Lu-Olo”, veteranu ida ne’ebé, hafoin manán iha eleisaun prezidensiál ne’ebé hala’o iha loron 20 fulan-marsu liubá, sei hala’o knaar hanesan Xefe Estadu Timor-Leste nian iha loron 20 fulan-maiu. Husi parte Governu nian sei reprezenta husi, Ministra Solidariedade Sosiál, Isabel Guterres. Inês Almeida, Ofisiál Ligasaun ba Asuntu Veteranu sira nian husi Gabinete Primeiru-Ministru, maka sai nu’udar koordenadora no portavós delegasaun ne’e nian. Embaixadór Timor-Leste nian iha Austrália, Embaixadór Abel Guterres, no konsul onoráriu sira Timor-Leste nian iha Queensland no Tazmánia envolve mós iha organizasaun viajen ida-ne’e nian.

Delegasaun sira sei hela iha Hobart Kamberra no Brisbane, ho vizita sira ne’ebé badak ba sentru rejionál sira Townsville nian, iha Queensland, no Yass, iha Gales Foun Sul (Nova Gales do Sul) nian. Iha Townsville, sira sei vizita kuartél Lavarack nian, sede Brigada da-3 husi Ezérsitu australianu nian, ne’ebé sai hanesan sentru INTERFET, Forsa Internasionál Dame nian husi Nasoins Unidas ba Timor, iha tinan 1999, no Operasaun Astute, iha tinan 2016, iha Timor-Leste.

Veteranu timoroan sira mós sei vizita delegasaun sira Liga Militár australianu sira nian, veteranu sira no mós sira ne’ebé sei ativu hela, nune’e mós organizasaun sira ne’ebé fó tulun ba antigu ofisiál no militár sira ne’ebé sei ativu hela, hanesan Mates4Mates, Veterans Care Association no Soldier On.  Iha vizita sira ne’e hotu, veteranu timoroan sira ne’e sei buka-hatene kona-ba funsionamentu husi servisu sira ne’e, atubele avalia kona-ba viabilidade atu harii estrutura apoiu nian sira hanesan ne’e iha Timor-leste. Iha loron 25 fulan-abríl, sira sei partisipa iha eventu sira kona-ba komemorasaun Loron ANZAC nian. informasaun sira kona-ba vizita ne’e no atualizasaun sira kona-ba atividade sira sei fó-sai iha site www.veteranvisit2017.org

Portavós, Ministru Estadu Agio Pereira, konsidera katak “inisiativa ida ne’e kontinua hametin amizade ida ne’ebé mai kedas husi Funu Mundiál Daruak, bainhira timoroan sira fó asisténsia ba komandu australianu sira, ho sakrifísu sira ne’ebé boot tebes. Iha tinan hirak ikus ne’e, harii ona tipu relasaun foun nian ida entre komunidade sira veteranu sira nian, no importante liu husi relasaun foun ne’e maka susesu husi inisiativa Timor Awakening. Lasu sira entre komunidade veteranu Austrália nian no veteranu Timor-Leste nian sai ezemplu di’ak tebes ida kona-ba espíritu amizade nian ida ne’ebé karakteriza ho kooperasaun no respeita malu”. REMATA