Banku Aziátiku Investimentu iha Infraestrutura simu Timor-Leste

Ministru Estadu no Prezidénsia Konsellu Ministru no

  Portavós ofisiál Governu Timor-Leste

 Díli, loron 28 fulan-marsu tinan 2017

Banku Aziátiku Investimentu iha Infraestrutura simu Timor-Leste

Iha loron 23 fulan-marsu, Konsellu Governadór sira husi Banku Aziátiku Investimentu iha Infraestrutura sira (BAII) fó-sai aprovasaun kona-ba kandidatura Timor-Leste nian atu hamutuk ho instituisaun ida-ne’e no simu Timor-Leste hanesan Membru Rejionál Potensiál. Ho ida-ne’e, Timor-Leste hamutuk ho país-membru 69 husi instituisaun ne’e, ne’ebé buka “hadi’a dezenvolvimentu ekonómiku no sosiál iha Ázia, hodi investe iha projetu infraestrutura ne’ebé ho kualidade aas, ne’ebé justifika finansiamentu no la halo aat ambiente.

Governu autoriza ona Ministériu Finansas hodi hahú prosesu adezaun iha fulan-setembru tinan 2016. Iha fulan-janeiru tinan 2017, Konsellu Ministrus analiza ona ho kuidadu termu no kondisaun sira kona-ba adezaun ne’e nian. Timor-Leste sei muda husi “membru potensiál” no sei ba hamutuk ho BAII liuhusi via ofisiál bainhira prosedimentu internu nesesáriu sira kompletu ona no prestasaun dahuluk kapitál nian bele tau ona iha banku.

Nasaun hotu ASEAN nian daudaun ne’e nu’udar membru Banku ida-ne’e nian ka iha hela prosesu adezaun. Sira hotu kongratula BAII nia orientasaun tanba halibur sira iha Ázia no iha finansiamentu infraestrutura kualidade nian.

Portavós Governu VI nian, Ministru Agio Pereira, hatete katak “Governu iha razaun ne’ebé di’ak atu kongratula ho aprovasaun ita-nia kandidatura nian ba BAII”, tanba “asosiasaun ba Banku ida-ne’e fó forsa ba ita-nia integrasaun iha país sira hotu Sudeste Aziátiku nian”. REMATA

   Ba leten