Konferénsia imprensa bona-ba dezastre naturál sira

Ses. 10 fevreiru 2017, 18:26h
Conferencia de imprensa desastres naturais

Governu hala’o ona konferénsia imprensa ida, ho objetivu atu fó informasaun detalladu ba komunidade kona-ba dezastre sira ne’ebé akontese iha semana liubá, iha territóriu tomak Timor-Leste nian, liuliu iha Munsípiu sira hanesan Baukau, Ermera, Ainaru, Same, Aileu no Lautein. Konferénsia ne’e hanesan inisiativa ida husi Ministériu Interiór no Ministériu Solidariedade Sosiál, ne’ebé koordena no iha responsabilidade atu hatán ba dezastre naturál sira ne’ebé akontese iha loron 9 fulan-fevereiru tinan 2017, iha sala sorumutuk edifísiu Bombeiru nian, iha Kaikoli, Dili.

Iha sorumutuk ne’e, Diretór-Jerál Servisu Operasionál Ministériu Interiór nian, Domingos Pinto, dehan katak, tuir notísia ne’ebé ita iha, kuaze iha Munisípiu sira hotu iha dezastre naturál. To’o loron 8 fulan-fevereiru tinan 2017, ema na’in 5 maka kanek, 3 iha Munisípiu Baukau no 2 iha Munisípiu Ermera, no na’in 3 maka mate, 2 iha Baukau no 1 iha Ermera, tanba ne’e maka ekipa konjunta husi Ministériu Interiór, Ministériu Solidariedade, no mós Krús Mean (Cruz Vermelha) halo intervensaun.

Diretór-Jerál ne’e informa katak dezastre sira ne’e mosu husi anin boot, ne’ebé sobu uma sira, provoka rai halai no hatohar ai-hun sira. Ekipa konjunta lori ona apoiu emerjénsia ba vítima sira ne’ebé hetan dezastre. Tanba Munisípiu rua ne’e seidauk iha bombeiru, nune’e hetan apoiu husi  ekipa husi Munisípiu Lospalos no Munisípiu Ainaru.

Diretór Nasionál Jestaun Risku Dezastre nian husi Ministériu Solidariedade Sosiál, Agostinho Cosme Belo, husi nia parte, informa katak nia simu ona informasaun husi Sentru Solidariedade Sosiál (SSS-sigla iha lian tetun) katak iha tan mate na’in 2 (inan no oan), iha Munisípiu Baukau, Postu Administrativu Bagia, Suku Devawasi. Ekipa ida, kompostu husi autoridade lokál sira, SSS Baukau nian, Bombeiru, Krús Mean (Cruz Vermelha) no parseiru sira fó ona apoiu umanitáriu ba família vítima sira husi anin-boot, hodi lori fós, supermi, sardiña lata, biskoit, no ai-hán sira seluk tan. Ekipa seluk ida mós fó ona apoiu emerjénsia nian ba ema na’in-tolu ne’ebé hetan kanek, iha Suku Atelari, Postu Administrativu Laga.

Iha Munsípiu Ermera, iha Postu Administrativu Hatulia, ferik ida mate tanba ai-hun hanehan.

SSS Ermera nian fó apoiu ba família matebian nian sira, hanesan kaixaun, fós no produtu seluk. Tuir rejistu ne’ebé, uma hamutuk 40 maka hetan estragu iha Postu Administrativu Atsabe, 6 iha Ermera no 8 iha Hatulia. Diretór Cosme Belo fó hanoin katak informasaun sira ne’e sei provizóriu hela. Ekipa konjunta Munisípiu Ermera nian sei halo avaliasaun ida atu hatene dadus definitivu sira kona-ba uma sira ne’ebé hetan estragu.

Iha Munisípiu Manufahi, dadus provizóriu hatudu katak totál uma ne’ebé hetan estragu hamutuk 158, inklui Postu Administrativu Same-Vila, Fatuberlihu no Turiskai. SSS Manufahi nian prepara ona apoiu emerjénsia ba vítima sira dezastre ne’e nian.

Iha Munisípiu Aileu, iha Postu Administrativu Remexiu, uma 2 maka hetan estragu. SSS lokál, akompaña husi ekipa Komisaun Jestaun Dezastre Munisipál sira (DDMC sigla-iha lian inglés), trata ona apoiu umanitáriu iha Munisípiu ne’ebá. Munisípiu Ainaru mós hasoru problema ne’ebé hanesan.

Iha Munisípiu Lautein, iha Suku Fuiluru, akontese udan-boot no anin-boot, ne’ebé estraga uma 2. Tanba ne’e, SSS Munisípiu nian no ekipa DDMC fó apoiu emerjénsia.

Cosme Belo realsa katak Ministériu rua ne’ebé sai nu’udar responsavel atu hatán ba dezastre naturál ne’ebé akontese iha territóriu tomak Timor-Leste nian promove ona koordenasaun ho elementu ligasaun munisípiu nian sira, atu halo análize ida kona-ba situasaun lokál no identifika vítima sira. Sira prepera hela ona materiál sira emerjénsia nian, hanesan ai-han no mós materiál sira seluk, atu fahe ba munisípiu sira ne’ebé hetan dezastre.

Ikusliu, Ministériu rua ne’e husu ba komunidade sira atu previne an husi dezastre naturál sira: karik imi hela iha fatin ne’ebé la seguru, tenke muda, atu labele hetan risku ba imi-nia moris.

   Ba leten