Sorumutuk Konsellu Ministrus nian iha loron 8 fulan-novembru tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 8 fulan-novembru tinan 2016
Komunikadu Imprensa
Sorumutuk Konsellu Ministrus nian iha loron 8 fulan-novembru tinan 2016
Konsellu Ministrus hala’o sorumutuk iha loron-tersa ne’e, iha Palásiu Governu nian, iha Dili, no fó apoiu ba proposta husi Ministru Estadu, Koordenadór Asuntu Ekonómiku kona-ba formalizasaun kandidatura kona-ba adezaun Timor-Leste nian ba Organizasaun Mundiál Komérsiu nian (OMK). Objetivu husi OMK, ne’ebé iha ona membru hamutuk 120 resin, maka “asegura katak, karik bele, fluksu komersiál sira sai simples, previzivel no livre liután”. Ninia funsaun prinsipál maka atu administra kriasaun no aplikasaun husi akordu komersiál lubuk ida entre nia membru sira. Adezaun Timor-Leste nian sei garante asesu ida ne’ebé boot liután husi nia esportasaun sira ba merkadu internasionál sira. OMK garante, la’os de’it troka komérsiál sira ne’ebé fasil liután, maibé mós asesu ba koñesimentu tékniku, apoiu sira no padraun lubuk ida ne’ebé promove kualidade husi produtu sira ne’ebé atu importa.
Konsellu Ministrus aprova ona, tuirmai, proposta tolu ne’ebé Ministériu Finansas aprezenta. Ida dahuluk, maka kona-ba asinatura akordu ida kona-ba empréstimu husi Banku Dezenvolvimentu Aziátiku ba finansiamentu estrada parte Manatutu-Baukau, husi projetu Estrada Nasionál 1 (Dili-Baukau). Ba daruak, kona-ba abertura no termu konta nian sira “escrow” iha ámbitu ezekusaun parseria públiku-privada ba Portu Tibar. Ikusliu maka, Rezolusaun Governu nian kona-ba adosaun norma sira husi Deklarasaun Arucha Revista, husi Organizasaun Mundiál Alfándega nian, kona-ba jestaun ne’ebé efikás no kona-ba étika iha matéria aduaneira nian. Deklarasaun ne’e, hetan adosaun iha Arucha, Tanzánia, iha tinan 1993, no hetan revizaun iha tinan 2003, iha prinsípiu orientadór sira kona-ba atividade aduaneira nian ne’ebé ko’alia kona-ba kombate ba korrupsaun.
Ministériu Finansas aprezenta mós relatóriu rua: ida kona-ba progresu husi verifikasaun servisu selu depois (pós-pago) no selu antes (pré-pago) ne’ebé kontrata ona ho Timor Telecom no ida seluk maka kona-ba ezekusaun Orsamentu tinan 2016 nian.
Konsellu Ministrus analiza ona mós projetu kona-ba kriasaun rejime kontrolu nian kona-ba sirkulasaun merkadoria, kareta, motorizada no bisikleta-motór (motociclo, iha lian portugés) sira iha fronteira rai-maran, ne’ebé tama no sai husi territóriu nasionál, ne’ebé Ministériu Interiór propoin. Medida ida ne’e sei kumpre faze daruak husi Planu Seguransa Interna nian, ne’ebé temi iha Programa Governu nian, ne’ebé propoin atu kontinua dezenvolve esforsu sira hodi “hadi’a kapasidade operasionál ne’ebé efetivu atubele previne no investiga krime, hametin seguransa públika no hadin’a kontrolu iha fronteira”. REMATA
