Eleisaun lokál sira la’o ho susesu
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 31 fulan-outubru tinan 2016
Eleisaun lokál sira la’o ho susesu
Governu fó parabéns ba Ministériu Administrasaun Estatál, Komisaun Nasionál Eleisaun nian [CNE], Sekretariadu Tékniku Administrasaun Eleitorál [STAE], no mós organizmu no instituisaun sira hotu ne’ebé envolve ona iha eleisaun ba órgaun suku nian sira ne’ebé la’o ho susesu iha loron 29 fulan-outubru. Eleisaun sira iha munisípiu 12 no Zona Espesiál Ambenu ne’ebé la’o ho di’ak no hakmatek, no envolve Suku 442 no Aldeia 2.225 ida-idak iha nasaun laran.
Eleitór sira hili delegadu feto ida no mane ida hodi reprezenta sira-nia Aldeia iha Konsellu Suku, Xefe Aldeia ida no Xefe Suku ida.
Ho eleitór hamutuk 728.363 ne’ebé rejista iha nivel nasionál no kandidatu hamutuk 2.071 ba Xefe Suku -, hala’o eleisaun sira sai nu’udar realizasaun ida ne’ebé boot tebes, ne’ebé so bele hala’o ho enerjia, kooperasaun no vontade di’ak husi organizadór, autoridade no komunidade sira.
Governu hala’o ona kampaña kona-ba informasaun públika ida ne’ebé boot molok hala’o eleisaun, atu fó hanoin ba sidadaun sira kona-ba prosesu ne’e no hodi esplika Lei Suku nian sira, ne’ebé regula eleisaun ne’e. Diploma legál ne’ebé hetan promulgasaun iha fulan-jullu ne’e, insentiva partisipasaun feto sira nian atu hala’o knaar lideransa nian, liuliu atu kandidata an ba Xefe Aldeia no Xefe Suku.
Iha nasaun laran, iha feto na’in 319 maka kandidata an ba Xefe Suku, iha munisípiu hotu-hotu no iha Zona Espesiál Oekusi Ambenu nian.
Rezultadu provizóriu sira hatudu katak maizoumenus 30% husi Xefe Suku na’in 442 maka eleitu ona iha ronda dahuluk votasaun nian, tanba sira hetan votu hamutuk 50% resin iha sira-nia Suku, iha loron 29 fulan-outubru. Votasaun ronda daruak nian ida sei halao iha Suku sira seluk iha loron 13 fulan-novembru, iha ne’ebé votante sira tenke hili entre kandidatu na’in-rua ne’ebé hetan númeru votu nian boot liu, iha ronda dahuluk, iha sira-nia fatin vota nian.
Rezultadu kona-ba sira ne’ebé eleitu ronda dahuluk hatudu katak persentajen husi Xefe Suku feto sira sa’e liu husi dala rua.
Portavós Governu nian, Ministru Estadu Agio Pereira, hateten katak, eleisaun sira ba órgaun Suku nian sira ne’ebé la’o ho di’ak no hakmatek nu’udar méritu ema hotu nian no sai hanesan ezemplu di’ak ida ba eleisaun prezidensiál no parlamentár iha tinan oin mai. Governu fó parabéns ba sira ne’ebé eleitu ona ba kargu Poder Lokál nian sira no rekoñese nia kompromisu atu lidera, dezenvolve no fó apoiu ba komunidade lokál sira”. REMATA
