Governu Timor-Leste

Prosesu eleisaun órgaun Suku sira nian hahú iha fulan-outubru to’o fulan-novembru, iha país laran.
Konsellu Suku nian sira haroru malu iha loron 14 fulan-outubru tinan 2016, atu forma meza eleitorál Suku sira nian no simu kandidatu sira ba Xefe Suku. Períodu divulgasaun manifestu eleitorál sira halo iha loron 14 to’o loron 27 fulan-outubru tinan 2016.
Asembleia Aldeia nian sira hasoru malu iha loron 29 fulan-outubru, hodi hili delegadu Aldeia nian sira iha Konsellu Suku, no mós Xefe Aldeia no Xefe Suku sira. Iha loron ne’e, sei sura votu no halo apuramentu rezultadu ba delegadu Aldeia sira no ba Xefe Aldeia, no mós, apuramentu inisiál rezultadu nian ba Xefe Suku sira.
Iha loron 30 fulan-outubru tinan 2016, Konsellu Suku nian sira hasoru malu atu halo apuramentu ba rezultadu finál eleisaun Xefe Suku nian sira. Karik presiza halo eleisaun volta daruak nian, sei hala’o iha loron 13 fulan-novembru tinan 2016, ho apuramentu finál kona-ba rezultadu volta daruak nian iha loron 14 fulan-novembru tinan 2016.
Iha loron 9 fulan-novembru tinan 2016, hala’o sorumutuk Konsellu Suku nian sira atu hili Lia-na’in (na’i ulun tradisionál sira: “Lia-na’in sira) no hili reprezentante Juventude iha Konsellu Suku, iha Suku hirak ne’ebé laiha volta daruak ba eleisaun Xefe Suku nian sira. Karik iha volta daruak ba eleisaun Xefe Suku, eleisaun ba Lia-na’in no Reprezentante Juventude ba Konsellu Suku, sei hala’o iha loron 24 fulan-novembru tinan 2016.
Kalendáriu foun kona-ba prosesu eleisaun líder komunitáriu sira aprova ona iha Konsellu Ministru, iha loron 13 fulan-setembru tinan 2016.