MPRM organiza debate públiku ba Ensinu Superiór
Ministériu Petróleu no Rekursus Minerais liuhusi Sekretariadu Extractive Industries Transparency Initiative (EITI-sigla iha lian ingles) nian organiza Debate Públiku ba nível Ensinu Superiór ho tema “Poténsia rekursus naturais iha Timor-Leste no distribuisaun rendimentu ba sustentabilidade fiskál”.
Abertura ofisiál ba debate públiku ne’e hala’o iha loron 10 fulan-juñu iha Universidade Nasionál Timor-Leste (UNTL), hafoin kontinua ba Dili Institute of Technology (DIT) no loron ikus iha Univerdidade Dili (UNDIL).
Objetivu husi debate ne’e mak atu fahe informasaun kona-ba sétor indústria ba estudante sira atu hakle’an liután koñesimentu no hatan ba dúvida sira kona-ba jestaun Governu kona-ba rekursus naturais iha Timor-Leste ho transparénsia, kontabilidade no mós adopta ba mekanismu globál EITI nian. Aleinde ne’e, estudante sira bele hatene informasaun kona-ba utilizasaun rendimentu husi minarai no gás, ba dezenvolve setór infraestrutura, edukasaun, saúde no seluk tan.
Ministru Petróleu no Rekursus Minerais, Alfredo Pires hateten, Timor-Leste nu’udar nasaun ida ne’ebe kumpri padraun EITI liu tinan sanulu ona no sai ezemplu ida ba mundu. “EITI ne’e prosesu ida, durante tinan sanulu liubá hetan evolusaun. Uluk hatudu de’it osan ne’ebé kompañia sira selu mai ita no osan ne’ebé Governu simu tenke hanesan no halo relatóriu anuál. Prosesu iha EITI ne’e dezenvolve hela, daudaun ne’e to’o ona parte ida ne’ebé labele hatudu de’it osan maibé mós tenke koa’lia sasan oin-oin de’it ne’ebé relasiona ho Industria Extrativa Minarai nian, Gás no mós Minerál sira”.
Alfredo Pires apela ba estudante universitáriu sira atu aproveita didi’ak debate ne’e, nune’e sira bele hetan informasaun loloos husi oradór sira husi Autoridade Nasionál Petróleu no Mineral (ANPM), kompañia Conoco Phillips, reprezentante husi Ministériu Finansas, Banku Sentrál Timor-Leste (BSTL), Ministériu Estadu Koordenadór Asuntu Ekonómiku no Ministériu Agrikultura no Peska no mós Sosiedade Sivíl.
Partisipa iha debate ne’e, estudante universitáriu sira, dekanu no dosente sira.
