Primeiru-Ministru ba Malázia atu partisipa iha Forum Ekonómiku Mundiál Kona-ba ASEAN
Iha loron 31 fulan-maiu, Primeiru-Ministru, Rui Maria de Araújo, sei halo viajen ba Kuala-Lumpur, iha Malázia, hamutuk ho Ministru Estadu, Koordenadór Asuntu Ekonómiku, Estanislau da Silva, no Vise-Ministru Negósiu Estranjeiru no Kooperasaun, Roberto Soares, atu partisipa iha Forum Ekonómiku Mundiál nian ne’ebé dedika ba ASEAN, edisaun tinan ida ne’e nian, ne’ebé sei hala’o iha loron 1 no 2 fulan-juñu.
Iha loron 1 fulan-juñu, Primeiru-Ministru halo “Observasaun espesiál sira”, hamutuk ho ninia omólogu husi Reinu Kamboja nian, Samdech Techo Hun Sen, iha sesaun kona-ba “Integrasaun finanseira iha kontestu Ázia Pasífiku nian”, ne’ebé sei hala’o husi tuku 10:30 to’o 12:00, iha Shangri-La Hotel. Iha parte loro-kraik, Primeiru-Ministru sei hola parte mós iha painél partisipante sira plenáriu abertura nian husi Forum Ekonómiku Mundiál da-25 kona-ba ASEAN, ne’ebé dedika ba “Elaborasaun Ajenda ASEAN nian ba inkluzaun no kreximentu”, ne’ebé sei hala’o husi tuku 15:00 no tuku 16:00, iha Shangri-La Hotel. Husi tuku 16:30 no tuku 18:00, Primeiru-Ministru partisipa iha Sorumutuk Informál entre Lider Ekonómiku Mundiál sira, inisiativa husi Forum ne’ebé tinan-tinan halibur lideransa sira husi área oioin iha sorumutuk informál no fexada sira.
Iha loron 2 fulan-juñu, iha tuku: 8:00, Primeiru-Ministru sei hasoru malu ho organizasaun tolu - Young Global Leaders, Global Shapers no Schwab Foundation Social Entrepreneurs-, eventu ida ne’ebé hanaran “Fundasaun sira hasoru-malu ho Lider: Primeiru-Ministru Rui Maria de Araújo”. Iha tuku:10:45, Primeiru-Ministru, hamutuk ho Ministru Estadu, Estanislau da Silva, no Vise-Ministru Negósiu Estranjeiru no Kooperasaun, Roberto Soares, marka ona sorumutuk bilaterál ida ho Vise-Primeiru-Ministru Vietname nian, Trinh Dinh Dung. Iha tuku: 12:00, iha Shangri-la Hotel, Primeiru-Ministru, halo diskursu abertura nian iha sesaun kona-ba “Vizaun Japaun no nasaun sira seluk ninian ba ASEAN”.
Iha viajen fila nian, iha loron 3 fulan-juñu, Primeiru-Ministru vizita Singapura ba sorumutuk kortezia ida ho ninia omólogu, Lee Hsien Loong.
Iha loron 4 fulan-juñu Primeiru-Ministru fila mai Timor-Leste.
Forum Ekonómiku Mundiál mak organizasaun privada ida, ne’ebé durante tinan barak halo tiha ona diálogu “empreza boot mundiál sira hamutuk 1000” no polítiku konvidadu sira tuur hamutuk hodi ko’alia. Iha tinan kotuk, ofisialmente kaer ona knaar hanesan organizasaun internasionál no hakarak sai hanesan plataforma globál ida ba kooperasaun públiku-privada. Timor-Leste sente onradu tanba hetan konvite ba daruak tuituir malu ba atividade sira Forum ne’e nian, tinan ida ne’e, sorumutuk dahuluk maka sorumutuk Davus nian (Suísa), iha fulan-janeiru, ne’ebé dedika ba ekonomia globál.
