Sorumutuk Konsellu Ministrus nian iha loron 26 fulan-abríl tinan 2016
Prezidénsia Konsellu Ministrus
VI Governu Konstitusionál
..............................................................................................................................
Dili, loron 26 fulan-abríl tinan 2016
Sorumutuk Konsellu Ministrus nian iha loron 26 fulan-abríl tinan 2016
Konsellu Ministrus hala’o sorumutuk iha tersa ne’e, loron 26 fulan-abríl tinan 2016, iha Dili, no aprova ona:
1. Dekretu-Lei ne’ebé aprova kurríkulu Programa Nasionál Ekivalénsia Ensinu Báziku ninian
Ho aprovasaun ne’e, hakarak fó oportunidade daruak ba foin-sa’e no adultu sira (husi tinan 15 to’o 17) ne’ebé presiza ka hakarak halo kompletu sira-nia aprendizajen iha nivel ensinu báziku, hodi garante ekivalénsia ba ensinu báziku. Lei ne’e aplika ba estabelesimentu ensinu báziku públiku, partikulár no kooperativu (nu’udar ezemplu, Sentru Komunitáriu Aprendizajen nian). Programa ne’e iha fleksibilidade no mós garantia ba kontinuidade hodi adapta an ba situasaun partikulár sira hosi ema sira ne’ebé maka sai hanesan alvu husi programa ne’e no ba kontestu sosiokulturál iha ne’ebé programa ne’e aplika.
2. Planu Asaun Nasionál ba aplikasaun Rezolusaun 1325 Konsellu Seguransa Nasoins Unidas nian (Feto, Pás no Seguransa)
Konsellu Ministrus aprova ona Planu Asaun Nasionál nian, ne’ebé lidera hosi Ministériu Interiór. Iha elaborasaun programa ne’e nian, partisipa organizmu Nasoins Unidas nian sira ne’ebé iha sede iha Timor-Leste, Sosiedade Sivíl, organizasaun feto nian sira, ministériu sanulu-resin-rua no doadór sira, no mós partisipante sira seluk. Haree ba konflitu armadu ne’ebé akontese iha pasadu iha nasaun ne’e, iha ne’ebé feto no labarik sira maka sai vítima maka’as liu, importante duni sira-nia partisipásaun atu promove pás no seguransa, protesaun iha violasaun direitu umanu no asesu ba justisa no ba servisu hodi enfrenta diskriminasaun.
Konsellu-Ministrus mós analiza ona:
1. Relatóriu kona-ba aplikasaun husi Konvensaun kona-ba Halakon Forma Diskriminasaun nian hotu-hotu kontra Feto sira
Sekretaria Estadu ba Apoiu no Promosaun Sosioekonómika Feto nian aprezenta ona rekomendasaun sira husi Komité ba Halakon Diskriminasaun sira hasoru Feto sira (CEDAW-sigla iha lia-inglés) kona-ba medida lejizlativa, judisiária no administrativa sira ne’ebé aplika iha nasaun ne’e, bazeia ba relatóriu jerál ne’ebé maihusi períodu husi tinan 2009 to’o tinan 2013, ne’ebé maka konta mós ho kontributu sira husi membru sira CEDAW nian no husi organizasaun sosiedade sivíl, no sira seluk.
2. Kalendáriu Lejizlativu
Tuir aprezentasaun ida uluk, iha sorumutuk Konsellu Ministrus nian iha loron 23 fulan-fevereiru tinan 2016, Sekretáriu Estadu Konsellu-Ministrus halo pontu situasaun ida kona-ba inisiativa legizlativa ministeriál sira ne’ebé atu aprezenta iha Konsellu Ministru, iha períodu fulan-marsu to’o fulan-juñu tinan ida ne’e nian. Kalendáriu ne’e ninia objetivu mak atu organiza serbisu sira no projetu sira ne’ebé haruka ba Konsellu-Ministrus
3. Planu Estratéjiku kona-ba Reestruturasaun no Modernizasaun Gráfika Nasionál
Iha sorumutuk Konsellu-Ministrus nian iha loron 23 fulan-fevereiru, aprova ona Rezolusaun Governu nian ne’ebé autoriza Gráfika Nasionál (GN) atu prodús no fa’an servisu ba setór públiku no privadu nian.
Investimentu iha ekipamentu gráfiku halo ona tuir nesesidade sira ne’ebé prevee iha Planu Estratéjiku Reestruturasaun no Modernizasaun Gráfika Nasionál nian no ho finansiamentu maihusi Orsamentu Jerál Estadu nian sira.
Hein katak to’o tinan 2017, GN iha ekipamentu teknolojia aas ne’ebé monta kompletu ona iha ne’ebá, atu iha kondisaun hodi halo kompetisaun iha merkadu.
