Sorumutuk Konsellu Ministrus nian iha loron 24 fulan-novembru tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 24 fulan-novembru tinan 2015
Komunikadu Imprensa
Sorumutuk Konsellu Ministrus nian iha loron 24 fulan-novembru tinan 2015
Konsellu Ministrus hala’o sorumutuk iha loron-tersa ne’e, 24 fulan-novembru tinan 2015, iha sala sorumutuk Konsellu Ministrus nian, iha Palásiu Governu Dili, no aprova ona:
1. Rezolusaun Governu nian kona-ba projetu investimentu iha unidade estrasaun ahu-ruin no produsaun simentu nian ida iha Baukau
Projetu investimentu TL Cement, Lda. ba konstrusaun unidade estrasaun ahu-ruin no produsaun simentu nian ida iha munisípiu Baukau nian envolve investimentu, husi empreza ne’e, iha orden millaun 400 dolar amerikanu no kria kampu serbisu permanente nian besik rihun ida. Empreza ne’e sei iha kapasidade produsaun clinker simentu nian tonelada rihun lima loron ida, hodibele hamenus dependénsia nasaun nian relasiona ho simentu ne’ebé importa.
Projetu ne’e inklui konstrusaun ponte-kais ida, pedreira sira, indústria kompleksu, parke enerjia eólika, solár, no seluk seluk tan. Estudu hirak ne’ebé hala’o tiha ona iha tinan 2014 hatudu ezisténsia rezerva ahu-ruin nian ida ne’ebé boot iha rejiaun ne’e.
Diploma ne’e determina kriasaun ekipa téknika ida, ne’ebé kompostu hosi elementu hirak ne’ebé hatudu hosi membru Governu nian sira iha área ne’ebé relevante ba projetu ne’e. Grupu serbisu ne’e, sei estuda modelu no termu sira husi akordu partisipasaun nian iha projetu ne’e no aprezenta ba-iha Konsellu Ministrus relatóriu ida ho konkluzaun no rekomendasaun sira.
2. Rezolusaun Governu nian ne’ebé harii Estrutura Koordenasaun Ekonómika nian
Estrutura Koordenasaun Ekonómika nian ne’e iha mandatu atu propoin no implementa medida no asaun konkreta sira hodi tau iha prátika Matadalan Reforma no Fomentu Ekonómiku Timor-Leste nian iha tinan 2015-2017, hodi kumpre Programa Governu Konstitusionál VI ne’ebé refere ba dinamizasaun no dezenvolvimentu setór privadu ekonomia nian.
3. Dekretu-Lei kona-ba Rejime Jurídiku Parseria Públiku Privada nian ba Portu Tibar
Dekretu-Lei ne’e estabelese kuadru jurídiku ne’ebé espesifikamente aplika ba Portu Tibar, hodi fó kompeténsia ba Governu atu halo negósiu no asina kontratu ho parseiru privadu, kona-ba dezenvolve konsesaun, finansiamentu, ezekusaun, esplorasaun no jestaun kona-ba portu bee kle’an nian foun.
4. Dekretu-Lei kona-ba Rejime Kontrolu Tabaku nian
Diploma ne’e, ne’ebé análiza ona iha sorumutuk Konsellu Ministrus nian iha loron 21 fulan-setembru tinan 2015, define rejime prevensaun no kontrolu ba tabaku iha nasaun ne’e.
Konsume tabaku iha Timor-Leste sei maka’as nafatin, ho refleksu iha saúde sidadaun sira nian. Maizoumenus 70% hosi moras la kontajioza ninia fatór prinsipál risku nian maka konsumu tabaku.
Diploma ne’e kumpre buat ne’ebé hakerek iha Konvensaun-Kuadru Organizasaun Mundiál Saúde nian ba Kontrolu Tabaku, ne’ebé ratifika iha tinan 2004 husi Parlamentu Nasionál.
5. Dekretu-Lei kona-ba pagamentu estraordináriu saláriu baze fulan ida nian ba setór públiku
Governu Konstitusional VI mantein polítika ida kona-ba prezervasaun, valorizasaun no rekoñesementu kona-ba rekursu umanu ne’ebé liga ba Administrasaun Públika, hodi efetua hanesan tinan sira liubá, pagamentu adisionál ida, ho karater exesionál, saláriu baze fulan ida ba traballadór Estadu nian sira, ne’ebé tau iha diploma ne’e.
Konsellu Ministru analiza mós:
1. Matadalan Reforma no Fomentu Ekonómiku Timor-Leste nian tinan 2015-2017
Projetu ida ne’e, ne’ebé analiza tiha ona iha sorumutuk Konsellu Ministru loron 27 fulan-outubru tinan 2015, ohin hetan ona aprovasaun husi Governu tuir orientasaun hirak ne’ebé propoin iha sorumutuk liubá.
Matadalan Reforma no Fomentu Ekonómiku Timor-Leste nian tinan 2015-2017, uluk hanaran Programa Reforma no Fomentu Ekonómiku Timor-Leste nian tinan 2015-2017, ninia objetivu mak atu asegura koordenasaun ida ne’ebé mak efikás no efisiente liután kona-ba asuntu ekonómiku nian sira, hodi fó prioridade ba dinamizasaun implementasaun medida ekonómika estruturante sira husi área prioritária ida-idak ne’ebé maka identifika ona iha Programa Governu nian no iha Planu Estratéjiku Dezenvolvimentu nian (PED).
2. Ajénsia Promosaun Investimentu nian no Esportasaun Timor-Leste, I.P. - Tradeinvest
Projetu ida ne’e, aprezenta husi Ministru Estadu Koordenadór Asuntu Ekonómiku, ninia objetivu mak atu formula fila-fali Ajénsia Espesializada Investimentu nian – Tradeinvest, hodi muda fali ba Ajénsia Promosaun Investimentu no Esportasaun– Tradeinvest Timor-Leste. Projetu ne’e prevee katak ajénsia foun ne’e hala’o ninia asaun ba promosaun, divulgasaun, koordenasaun, ajilizasaun no akompañamentu ba oportunidade investimentu nian sira iha nasaun ne’e no esportasaun beins no servisu ne’ebé prodús iha Timor-Leste, hodi funsiona hanesan veíkulu privilejiadu ba promosaun ekonómika nasaun nian.
