Vicente Fernandes e Brito simu pose hanesan Diretór Polísia Sientífika Investigasaun Kriminál Timor-Leste nian
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 2 fulan-outubru tinan 2015
Vicente Fernandes e Brito simu pose hanesan Diretór Polísia Sientífika Investigasaun Kriminál Timor-Leste nian
Serimónia fó pose ba Diretór Polísia Sientífika Investigasaun Kriminál nian (PSIK) foun hala’o iha loron 1 fulan-outubru, iha Sentru Formasaun Jurídika nian. Primeiru-Ministru hala’o serbisu iha substituisaun nia laran, Ministru Estadu no Prezidénsia Konsellu Ministrus, Agio Pereira, fó pose ba Vicente Fernandes Brito hanesan Diretór foun PSIK nian.
Ho karreira tinan 15 tinan iha área justisa Timor nian, hanesan majistradu ho karreira no Prokuradór, Vicente Fernandes e Brito sa’e ba kargu Prokuradór-Jerál Adjuntu.
PSIK harii ofisialmente iha fulan-maiu tinan kotuk atu halo serbisu iha kooperasaun ho entidade sira seluk ne’ebé halo investigasaun kriminál iha nivel nasionál nian, hanesan Polísia Nasionál Timor-Leste (PNTL), Komisaun Anti-Korrupsaun no Serbisu Migrasaun nian. Iha nivel internasionál, PSIKsei hala’o serbisu ho INTERPOL no ho ajénsia sira seluk ne’ebé hala’o serbisu kona-ba kombate hasoru krime tranznasionál. PSIK hanesan entidade ba aplikasaun husi lei sientífika nian, foka liuba investigasaun kriminál nian, estruturada ho forma independente, teknikamente ekipada, ho pesoál ne’ebé iha kualifikasaun aas.
Durante serimónia ne’e, ne'ebé konta ho membru husi nivel aas husi Governu, no setór Judisiáriu, Primeiru-Ministru ne’ebé hala’o serbisu iha substituisaun, Agio Pereira, Sekretáriu Estadu Terras Propriedades nian ne’ebé reprezenta Ministru Justisa, Jaime Xavier Lopes no Diretór PSIK, Vicente Fernandes Brito, halo diskursu.
Sekretáriu Estadu, Jaime Xavier Lopes, dehan katak PSIK hala’o knaar importante iha luta hasoru krime organizadu no fundamentál iha kombate hasoru atividade kriminoza sira ne’ebé susar atu rezolve no kompleksa liután ba beibeik. Nia fó hanoin hikas mós katak públiku hein atu PSIK mantein padraun “profisionalizmu, komportamentu étiku, imparsialidade no independénsia” nian ne’ebé aas.
Vicente Fernandes Brito, salienta katak PSIK tenke hala’o ninia serbisu ho rigór sientífiku, atubele identifika, rekolla prova sira no kontribui ba prosesu julgamentu ida ne’ebé maka justu, kredivel no imparsiál. Nia mós rekoñese katak knaar ne’ebé nia sei ezerse durante tinan hirak uluk, iha konsolidasaun ba instituisaun ne’e no kompromete an atu halo buat hotu hodi bele responde ba espetativa hirak ne’ebé iha ona ba nia nomeasaun.
Ministru Estadu Agio Pereira kontgratula Diretór foun ne’e ba ninia nomeasaun, no hein katak nia bele hetan susesu iha nia kargu foun ne’e. Nia salienta mós katak “esperiénsia profisionál Vicente Fernandes Brito nian iha setór Justisa no ninia padraun sira ne’ebé aas kona-ba étika profisionál sei konsolida PSIK, kona-ba oinsá halo investigasaun, rekolla prova, aplika metodolojia sientífika ho rigór no ikusmai, serbí Estadu Direitu tuir Konstituisaun Timor-Leste nian”.
