Edisaun dahituk Tour Timór nian sei hala’o iha Estrada
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 16 fulan-setembru tinan 2015
Edisaun dahituk Tour Timór nian sei hala’o iha Estrada
Tour Timór nian sai hosi Díli iha domingu, loron 13 fulan-setembru. Siklista atus ida resin partisipa iha edisaun dahituk ne’e la’o hale’u Timór, ne’ebé konta mós ho etapa lima liuhosi paizajen furak Timór nian. Iha kinta-feira, loron 17 fulan-setembru, loron ne’ebé mak “Tour” Timór sei remata fali iha Díli, siklista internasionál limanulu-resin-sia no siklista nasionál limanulu-resin-ida sira hatudu dunik sira nia rezisténsia no abilidade.
Primeiru-Ministru akompña no aten barani ba partisipante sira durante kilómetru tolunulu dahuluk nian, iha domingu dadeer. Rui Maria de Araújo, médiku no antigu Ministru Saúde ne’e, siklista ne’ebé iha vontade tebes atu hala’o knaar nu’udar defensór ba saúde no forma fízika nian di’ak.
Etapa dahuluk ba tinan ida ne’e liga ona Díli ho Laklubár. Iha loron daruak, nia bá fali bee moos Betanu nian, iha kosta súl. Etapa datoluk, iha loron 15 fulan-setembru, iha ona viajen ne’ebé badak, sa’e ba parte norte nian, iha diresaun ba Ainaru. Ba ohin nian rezerva ona prova foho badak ida, iha Hatu Builiku, ho paizajem únika no temperatura sira ne’ebé di’ak. Iha etapa ikus, aban, sei halo viajen tuun mai Díli, ne’ebé tenke hakotu iha loro-kraik. Serimónia entrega prémiu sira sei hala’o iha kalan, iha Sentru Konvensaun Díli nian.
Tour Timor nian ne’ebé organiza hosi Ministériu Turizmu, Arte no Kultura no Federasaun Siklizmu Timor-Leste nian nu’udar eventu ida ne’ebé hetan rekoñesimentu internasionál, ho objetivu hadi’a turizmu, hametin pás, armonia no orgullu nasionál no fó oportunidade ba dezenvolvimentu ekonómiku.
Portavós Governu Konstitusionál VI nian, Ministru Estadu Ágio Pereira, hateten katak “ dala ida tan sai ksolok ida hodi fó apoiu ba Tour Timor nian no simu atleta koñesidu sira iha nasaun oioin. Ami hein katak sira gosta no halo prova dia’k ida, no hahú, ka kontinua, amizade ida ne’ebé boot ho Timor-Leste. Ami simu siklista nasionál sira ne’ebé hala’o treinu maka’as no hadi’a sira nia dezempeñu iha tinan ba tinan. Governu agradese ba ema hotu nia envolvimentu iha organizasaun, voluntáriu no patriosinadór sira ne’ebé investe ba-iha eventu ida ne’e, no fó valór ba apoiu ne’ebé fó ona liuhosi ema rihun ba rihun no labarik sira durante edisaun dahituk Tour Timor nian ne’e”.
