Timor-Leste no Indonézia hala’o sorumutuk ba demarkasaun fronteira sira nian

Kua. 12 agostu 2015, 17:24h
Demarcação fronteiras 2015 MNEC

Timor-Leste no Indonézia hala’o sorumutuk da-XXVII Subkomité Tékniku nian ba Demarkasaun Fronteira sira no Regulamentasaun, iha Institutu Diplomátiku Ministériu Negósiu Estranjeirus no Kooperasaun, iha Dili. Sorumutuk ne’e hala’o ona iha loron 10 no 11 fulan-agostu tinan 2015.

Diretór Nasionál Asuntu Sudeste Aziátiku, Marcos da Costa, nu’udar xefe delegasaun Timor-Leste nian, esplika katak, iha sorumutuk ne’e, nasaun rua ne’e sei halo kalendáriu ba avaliasaun iha terrenu kona-ba demarkasaun no instalasaun marku no kuadru avizu fronteira nian sira iha área hirak ne’ebé iha tiha ona akordu entre nasaun rua.

Tuir planu, iha tinan ida, dala ida, Timor-Leste no Indonézia tau iha fronteira marku 80. Husi kedas tinan 2005, hatuur ona marku kauze 500. Nasaun rua ne’e tenke halo instalasaun tinan ida ne’e liu 200. Timor-Leste kompromete ona hodi tau marku 120 no Indonézia tau 80.

Iha tinan ne’e ami konsege kumpre planu ne’e karik, ida ne’e signifika katak demarkasaun prinsipál fronteira sira remata ona. Iha tempu oin mai, sei rezolve atu halo de’it demarkasaun iha Oekuse”, Marcos da Costa, deklara.

Iha sorumutuk ne’e, diskuti kona-ba produsaun mapa ne’ebé maka sei fasilita servisu iha terrenu, hanesan servisu  seguransa fronteira nian sira. Prosesu halo mapa úniku ne’e hahú tiha ona iha tinan 2013 no sei hakotu iha tinan 2016.

Delegasaun Indonézia nian ne’e kompstu hosi reprezentante sira hosi Ministériu Negósius Estranjeirus, Ministériu Defeza, Ajénsia Informasaun (Geospatial) nian ne’ebé trata produsaun mapa sira nian iha nasaun ne’ebá no Emabaixada iha Dili.

Delegasaun Timor-Leste nian lidera hosi Ministru Negósius Estranjeirus no Kooperasaun, Hernani Coelho, ne’ebé akompaña hosi reprezentante sira Alfándega (Ministériu Finansas), Carantina, Unidade Polísia Fronteira no Imigrasaun no hosi Gabinete Kaza Militár Prezidénsia Repúblika nian.

   Ba leten