Membru Governu nian na’in tolu simu pose
Serimónia fó pose ba membru Governu nian na’in tolu, hahú iha óras tuku 9 loron 10 fulan-agostu, iha Palásiu Prezidensiál, iha Aitarak-Laran, Dili.
António da Conceição, ne’ebé to’o oras ne’e asume pasta Ministru Komérsiu, Indústria no Ambiente nian, simu pose nu’udar Ministru Estadu, Koordenadór Asuntu Sosiál no Ministru Edukasaun nian. Constâncio da Conceição Pinto, ne’ebé antes ne’e sai hanesan Vise-Ministru Komérsiu, Indústria no Ambiente nian, prienxe kargu ne’ebé husik mamuk ne’e hodi sai hanesan Ministru Komérsiu, Indústria no Ambiente. Simu nomeasaun atu sai ninia Vise-Ministru maka Filipus Nino Pereira.
Desizaun ne’e Prezidente Repúblika, Taur Matan Ruak, maka foti bazeia ba proposta ida ne’ebé Primeiru-Ministru, Rui Maria de Araújo, haruka. Xefe Ezekutivu konsulta uluk ho partidu sira ne’ebé forma Governu, molok haruka proposta ne’e ba Xefe Estadu.
Remodelasaun ne’e halo bazeia ba nesesidade atu substitui Fernando La Sama de Araújo, Ministru Estadu, Koordenadór Asuntu Sosiál no Ministru Edukasaun, ne’ebé mate iha loron 2 fulan juñu liubá. Husikedas tempu ne’ebá, Vise-Ministra Edukasaun, Dulce Jesus Soares, mak hala’o funsaun hanesan Ministra Edukasaun interina.
