Governu Timor-Leste

Prezidénsia Konsellu Ministrus

VI Governu Konstitusionál

..............................................................................................................................

Díli, loron 31 fulan-jullu tinan 2015

Komunikadu Imprensa

Sorumutuk estraordináriu Konsellu Ministrus iha loron 31 fulan-jullu tinan 2015

Konsellu Ministrus hala’o sorumutuk estraordináriu iha sesta ne’e, loron 31 fulan-jullu tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova ona:

1. Rezolusaun ne’ebé kria Komisaun ba Reforma Fiskál

Diploma ida ne’e kria komisaun ba reforma fiskál, ne’ebé konstitui husi ekipa téknika ida ne’ebé kompostu husi elementu sira husi Ministériu Finansas, Gabinete Primeiru-Ministru, Ministériu Justisa, Ministériu Obras Públikas, Transporte no Komunikasaun, instituisaun sira no Munisípiu sira no entidade governu nian sira ne’ebé mak konsideradu relevante. Kargu Koordenadora Komisaun ne’e nian atribui ba Fernanda Borges.

Komisaun ne’e sei propoin reforma lejizlativa, prosedimentu, regulamentu no polítika fiskál sira ne’ebé atu aplika iha ministériu, munisípiu, instituisaun no entidade sira seluk husi administrasaun direta no indireta Estadu nian.

Diploma ida ne’e kria mós, Konsellu Interministeriál no Komité Akompañamentu Reforma Fiskál nian.

Iha tempu besik, Komisaun ne’e tenke submete Planu Reforma Fiskál nian ida ba Konsellu Ministrus.

2. Dekretu-Lei ne’ebé estabelese Orgánika Prezidénsia Konsellu Ministrus nian

Ho diploma ne’e, Prezidénsia Konsellu Ministrus (PKM) adota estrutura ida ne’ebé atu hanesan ministériu ida nian, maske ho partikularidede balun tanba ninia karakterístika hanesan kakuluk husi administrasaun husi estrutura Governu nian.

Nune’e, hanesan ho organizasaun tradisionál ministériu sira nian, maka kria estrutura únika ba serbisu administrativu nian sira ne’ebé, iha diresaun Ministru Estadu no Prezidénsia konsellu Ministrus nia okos, fó apoiu ba Primeiru-Ministru no membru sira seluk ne’ebé integra iha PKM.

3. Rezolusaun ne’ebé aprova ajuste komplementár ba Akordu Báziku kona-ba Kooperasaun Téknika entre governu Timor-Leste no Brazíl ba implementasaun Programa Fortalesimentu Setór Justisa Timor-Leste nian

Konsellu Ministrus aprova ona ajuste komplementár ba Akordu Báziku kona-ba Kooperasaun Téknika Governu Repúblika Federativa Brazíl nian no Governu Repúblika Demokrátika Timor-Leste ba implementasaun Programa Fortalesimentu Setór Justisa Timor-Leste nian.

Dokumentu ne’e ho objetivu atu viabiliza Programa Fortalesimentu Setór Justisa Timor-Leste nian ida liuhusi apoiu ba Governu iha elaborasaun lei sira, iha formasaun rekursu umanu no iha kriasaun estrutura sira apoiu ba Justisa nian.

4. Rezolusaun ne’ebé nomeia membru sira husi Komité Revizaun Polítika

Komité Revizaun Polítika nomeadu husi Konsellu Ministrus ho objetivu, entre hirak seluk ne’ebé iha, atu avalia kapasidade atu atinje kompromisu no objetivu sira ne’ebé tau iha dokumentu estratéjiku sira ba tinan finanseiru ne’ebé mak dokumentu sira ne’e reporta.

5. Proposta kona-ba Rezolusaun ba aprovasaun Konvensaun Internasionál UNESCO nian kontra Dopajen iha Desportu

Proposta ida ne’e sei aprezenta ba Parlamentu Nasionál, órgaun ne’ebé iha kompeténsia atu aprova no ratifika konvensaun internasionál sira. Propoin adezaun Timor-Leste nian ba Konvensaun Internasionál kontra Dopajen iha Desportu, inklui mós ninia aneksu I no II, ne’ebé lansa ona husi Organizasaun Nasoins Unidas nian ba Edukasaun, Siénsia no Kultura (UNESCO).

 

Konsellu Ministru halo ona mós análize ba:

1. Reforma Fiskál

Ministériu Finansas aprezenta ona ba Konsellu Ministrus projetu kona-ba Reforma Fiskál, ne’ebé sai hanesan prioridade ida entre prioridade sira seluk husi programa Governu Konstitusional VI nian. Fó ona esplikasaun kona-ba motivu no prinsípiu sira ne’ebé mak sei gia reforma ida ne’e no rezultadu sira ne’ebé mak hakarak atu hetan. Projetu ne’e dezenvolve hela husi ekipa espesiál ida, iha Ministériu ne’e nia laran.

2. Relatóriu inisiál kona-ba Konvensaun kontra Tortura no Kastigu ka Tratamentu Kruél, Dezumanu no Degradante sira seluk

Ministériu Justisa aprezenta ona relatóriu inisiál kona-ba Konvensaun kontra Tortura no Kastigu ka Tratamentu Kruél, Dezumanu no Degradante sira seluk, rekizitu préviu atubele ratifika konvensaun ida. Timor-Leste hatudu ninia intensaun atu ratifika dokumentu ida ne’e ho asinatura ba protokolu opsionál nian.

Relatóriu ne’e, ne’ebé hetan aprovasaun husi Konsellu Ministrus, kontein informasaun demografika sira, husi estrutura polítika, sosiál no orden jurídika ne’ebé maka garante katak Timor-Leste ne’e Estadu Direitu Demokrátiku ida.