Governu Timor-Leste

Sorumutuk Ordinária XX Konsellu Ministrus CPLP nian hala’o iha loron 24 fulan-jullu, iha Ministériu Negósiu Estranjeiru no Kooperasaun, iha Dili. Serbisu preparasaun ba sorumutuk ida ne’e komesa ho Sorumutuk XXXI Pontu Fokál Kooperasaun nian. Iha loron 22, Grupu Tékniku Preparasaun Komité Konsertasaun Permanente hala’o sorumutuk, no iha loron 23, hala’o Sorumutuk Ordinária da-184 Komíte Konsentrasaun Permanente.

Sorumutuk Ordinária XX, Primeiru-Ministru, Rui Maria de Araújo, mak loke, iha ne’ebé nia hatete katak “CPLP hanesan plataforma di’ak liu ne’ebé mak ita, nasaun hirak ne’ebé ko’alia lian portugés, iha atu pozisiona ita-nia an iha forum internasionál sira, hanesan ONU no ninia ajénsia sira, no rejionál sira hanesan SADC [husi nasaun sira Áfrika parte Súl nian], CEDEAO [husi Áfrika parte Osidentál nian], MERCOSUL [husi Amérika parte Súl nian], Uniaun Europeia no ASEAN [husi Sudeste Aziátiku]”. Nune’e, “internasionalizasaun lian portugés, hanesan lian serbisu Nasoins Unidas ninian no organizasaun internasionál importante sira seluk, tenke sai hanesan objetivu ne’ebé asentua iha ita-nia polítika komún”.

Primeiru-Ministru Timor-Leste nian ne’e realsa mós katak nesesidade “kona-ba estratéjia foun ida ne’ebé mak hametin ita, ne’ebé projeta CPLP hanesan buat ida de’it, ne’ebé hakat liu interese Estadu-Membru ida-idak nian, halo ita hodi hetan espasu iha nivel mundu nian”. Nia fó hanesan ezemplu proposta Timor-Leste nian – ne’ebé lansa durante Simeira X Xefe Estadu no Xefe Governu nian no reforsa iha Sorumutuk I Ministru Enerjia CPLP nian sira – kona-ba kriasaun konsórsiu empreza idrokarbonetu nian sira husi Estadu-Membru sira, ho hanoin atu garante katak rikusoin husi rekursu naturál sira sei sai hanesan benefísiu sira ba nasaun sia ne’ebé partense ba organizasaun ne’e.

Iha Sorumutuk Ordinária XX Konsellu Ministrus CPLP nian ne’e aprova ona rezolusaun sira tuirmai ne’e: relatóriu “Vizaun estratéjika foun CPLP nian”, sede Reprezentasaun CPLP nian iha Dili; konsesaun kategoria Observadór Konsultivu CPLP nian; kriasaun Ensinu Tékniku Profisionalizante iha CPLP; elaborasaun “Relatóriu kona-ba Estatístika Edukasaun nian sira husi CPLP”; Forum Sosiedade Sivíl II; tabela kona-ba despeza sira husi Orsamentu ba Funsionamentu Sekretariadu Ezekutivu CPLP nian ba tinan 2015; Orsamentu ba Funsionamentu Sekretariadu Ezekutivu nian ba tinan 2016; Orsamentu ba Funsionamentu Institutu Internasionál Lian Portugés ba tinan 2016; no “Relatóriu kona-ba auditoria ba demonstrasaun finanseira sira IILP nian” husi tinan 2013.

Iha Sorumtuk ne’e asina mós Konvensaun Multilaterál Seguransa Sosiál nian no aprova mós omenajen ba matebian Ministru Estadu, Koordenadór Asuntu Sosiál no Ministru Edukasaun, Fernando La Sama de Araújo.