Governu Timor-Leste

Projetu Sentru Aprendizajen no Formasaun Eskolár (CAFE, sigla iha lian portugés), rezultadu husi kooperasaun entre Ministériu Edukasaun no Siénsia Portugál nian no Ministériu Edukasaun Timor-Leste nian, foin dadaun ne’e renova ba períodu ida ho durasaun tinan haat tan.

Mosu hafoin Projetu Eskola Referénsia, Projetu CAFE reforsa ninia komponente formasaun nian ba profesór sira, liuhusi formasaun komplementár, ho karáter sientífiko-pedagójiku, atu tulun profesór nasionál hirak ne’ebé kompleta ona sira-nia formasaun inisiál, no mós profesór sira husi eskola públika sira seluk husi área edukativa lokál. Iha tinan ida ne’e, atividade eskola nian sira sei hahú iha munisípiu, Vikeke no Ainaru, hodi asegura reprezentasaun ne’ebé justu husi Projetu iha territóriu tomak.

Maski estrutura Governu nian sira ne’ebé agora ne’e sei foun hela no tanba atrazu iha ezekuasaun orsamentu tinan 2015 nian, Ministériu Edukasaun Timor-Leste nian fó sai ona katak pagamentu saláriu nian iha ona faze regularizasaun nian.

Iha enkuadramentu foun ida ne’e, Projetu ne’e, dadaun ne’e, fó benefísiu ba alunu hamutuk 4.997 husi pré-eskolár no siklu da-1 no da-2 ensinu báziku nian, no konta ho dosente 93 husi Portugál no profesór nasionál na’in 34 ne’ebé remata ona sira-nia formasaun komplementár iha tinan rua ikus ne’e, iha CAFE. La kle’ur tan, kurakuran profesór 60 husi Portugál sei kompleta korpu dosente nian iha Sentru 13.

Iha ámbitu akordu entre nasaun rua ne’e, Timor-Leste iha responsabilidade atu selu saláriu dosente sira-nian, nune’e mós ho sira nia hela-fatin, transporte, seguru saúde nian no mós viajen ho tan regalia sira seluk.